Publicado 2020/6/5 17:43:04 +02:00CET

Jaurlaritzak euskarazko ia 100 eduki eta baliabide digital bildu ditu 'Gozatu Sarean Euskaraz' atarian

'Gozatu Sarean Euskaraz' Web Ataria.
IREKIA

BILBO, 5 Jun. (EUROPA PRESS) -

Eusko Jaurlaritzako Kultura eta Hizkuntza Politika Saliak abian jarri du 'Gozatu Sarean Euskaraz' ataria, ingurune digitalerako euskarazko edukiak eta baliabideak biltzeko. Une honetan ia 100 baliabide digital bildu dira bertan, hala nola webserieak, aplikazioak, webguneak, mugikorrerako jolasak eta haurrentzako hainbat baliabide. Atarian sartutako produktu guztiek Jaurlaritzaren babesa jaso dute, eta orain, egindako lan hori ezagutarazteko asmoz, zabalkunde kanpaina bat egingo da gizartesareetan.

Hizkuntza Politikako Sailburuordetzak urteak daramatza ingurune digitalerako euskarazko edukiak eta bestelako baliabideak diruz laguntzen eta sustatzen. Horren ondorioz, dirulaguntza deialdietan edo beste sustapen lerro batzuetan parte hartu duten guztiei esker, une honetan euskarazko baliabide ugari aurki daitezke sarean. Batzuek sona handia lortu dute, baina beste batzuk Interneteko zabaltasunean galdu dira.

"Ingurune Digitalean Euskara Sustatzeko Deialdian esleipendun izan direnei eskatzen zaie produktuak zabaltzeko, eta egiten dute, baina, hala ere, kasu batzuetan ez da erraza baliabide horiek ezagun bilakatzea. Horretaz kezkatuta, eta pandemiaren garai hauetan sareko baliabideek hartu duten pisua kontuan hartuta, beste pauso bat ematea erabaki dugu", adierazi du Miren Dobaran Hizkuntza Politikako sailburuordeak.

Horrela, Jaurlaritzak bi ekimen jarri ditu abian eduki eta baliabide horiek dinamizatzeko. Batetik, horiek guztiak biltegi digital komun batean bildu ditu, gozatusareaneuskaraz.eus atarian. Bertan aurki daitezke haurrentzako baliabideak (Irrien Lagunak, Eskulanak, Bitxikeriak.eus, Liburu Gaztea), webserieak (Otsoen Lurraldea, Bizi Txarra, Puntu Koma, Nomofobikoak), helduentzako baliabide eta aplikazioak (Egunean Behin, Pagotxa.eus) edota kirolari buruzkoak (Euskal Kirolari, Mendiak, Hamaika Minutu).

Bestetik, produktu horiek zabaltzeko kanpaina bat abiatzea erabaki du, aurretik egindako zabalkunde lanari bultzada bat emateko. Kanpaina hori gizarte sareetan burutuko da (Youtube, Instagram, Twitter eta Facebook), datozen hilabeteetan. Hasieran kirolari eta aisialdiaren ingurukoak sustatuko dira eta, horren ostean, kulturaren ingurukoak. Jaurlaritzak inoiz sustatutako produktuak aukeratu dira zabaltzeko. Kanpainaren mezua 'Gozatu Sarean Euskaraz!' izango da.