Kirol zuzenbideko adituekin bildu da Jaurlaritza euskal selekzioen ofizialtasunaz aritzeko

BILBO 4 (EUROPA PRESS)

Ibone Bengoetxea Eusko Jaurlaritzako lehen lehendakariorde eta Kultura eta Hizkuntza Politikako sailburuak kirol zuzenbidean eta nazioarteko araudian espezializatutako legelariak elkartu ditu ostegun honetan euskal kirol selekzioen ofizialtasuna ardatz izan duen lan bileran.

Jaurlaritzak jakinarazi duenez, Juantxo Landaberea, Juanjo Alvarez, Juan Carlos Soto, David Salinas-Armendariz eta Javier Cortazar legelariek parte hartu dute bilkuran, besteak beste, eta, Jaurlaritzaren aldetik, lehendakariordearekin batera, Gorka Iturriaga Jarduera Fisikoaren eta Kirolaren zuzendaria eta Elisabeth Altube zuzendaritzako legelaria izan dira. Angel Gurrutxaga Euskal Kirol Federazioen Batasuneko presidenteak ere parte hartu du, entzule gisa.

Euskal Selekzioen Ofizialtasunaren Agendaren baitan egin da bilera, Eusko Jaurlaritzaren lehentasun estrategikoetako batean. Jaurlaritzak nazioartean estaturik gabeko nazioen federazioen egoera aztertzeko eskatu zuen txostena aberastea eta kontrastatzea izan da bileraren helburua.

Lehendakariordeak berariaz eskertu du legelarien parte hartzea: "Eusko Jaurlaritzarentzat funtsezkoa da kirol zuzenbidearen arloan lan egiten dutenen esperientzia eta ezagutza izatea. Zuen ekarpena funtsezkoa da txostenaren zorroztasuna, sendotasuna eta baliagarritasuna bermatzeko".

Imanol Pradales Jaurlaritzako lehendakariak euskal federazioekin 2025eko azaroaren 10ean Ofizialtasunaren Agendaren aurkezpenaren esparruan hartutako konpromisoaren emaitza da txostena. Txosten horrek nazioarteko federazioen araudia aztertzen du, kide berriak onartzeari dagokionez, eta estaturik gabeko nazioei arreta berezia eskaintzen dio, bai eta haien selekzioek nazioarteko lehiaketa ofizialetan parte hartzeko baldintzei ere. Txostena 2004an enkargatu eta 2014an eguneratu zen.

Orain, analisi berriaren asmoa da diagnostiko berria egitea eta, hala, esparru eguneratu bat ezartzea. Helburua, beraz, bikoitza da: alde batetik, indarrean dagoen esparru juridikoak ofizialtasunean aurrera egiteko eskaintzen dituen aukerak identifikatzea, eta, bestetik, nazioarteko kirol erakundeen, haien funtzionatzeko irizpideen eta aukera berrien agertoki eguneratua eskaintzea.

"PROZESU KONPLEXUA"

Ibone Bengoetxeak adierazi duenez, "euskal selekzioen ofizialtasuna lortzea ez da soilik borondate kontua. Prozesu konplexua da, eta estrategia, ezagutza eta lan koordinatua behar ditu, hainbat mailatan".

Ildo horretan, gogora ekarri du ofizialtasuna lortzeko bidean hainbat direla eman beharreko urratsak: euskal federazio bakoitzak borondatea berariaz adieraztea; Estatuko marko juridikoarekin bat etortzea, eta, azkenik, nazioarteko federazioek onartzea.

Orobat, Bengoetxeak azpimarratu duenez, aldarrikapen sozialaz eta selekzioekiko pertenentzia sentimenduaz gain, helburu horretan aurrera egiteko faktore erabakigarriak izango dira "estrategia, arau markoa ezagutzea, aurrez egindako lana, harremanak, konplizitateak eta diplomazia".

Bad, Eusko Jaurlaritzak lan ildo hori garatzen jarraituko du datozen hilabeteetan, kirol federazioekin eta eragile espezializatuekin lankidetzan, estrategia berriak diseinatzeko. Helburua da Euskadik nazioarteko kirolean duen presentzia eta aintzatespena handitzea.