BILBO, 13 (EUROPA PRESS)
AEK-k deialdia egin die Korrika-AEK kultur sorkuntzarako beka lortu nahi dutenei lanak aurkez ditzaten. Bekaren ezaugarri guztiak dagoeneko eguneratu dira www.korrika.eus webgunean, eta proposamenak aurtengo urritik 2022ko urtarrila bitarte aurkeztu beharko dira.
AEK-k jakinarazi duenez, urrats hau eginda, hemendik bi ediziora begira jarriko da: batetik, kultur sorkuntzari beste bultzada bat emateko, eta bestetik, Korrikako kultur eskaintza guztiz berritzeko. Hori dela eta, tartean izango den 22. Korrika azaroan aurkeztuko duenez, kultur eskaintza beste era batean osatuko du, elkarlana bultzatuz, Euskal Herrian abian izango diren sorkuntza lanak Korrikan ere sustatuz eta leku gehiagora eramanez.
Horrela, Korrika Kulturalaren bidez, AEK-k lan bat sarituko du beste behin. Euskal sortzaile ororentzat da deialdia. Proposamenak diziplina anitz edo bakarra barnebil dezake, eta emanaldiek agertoki edo plaza batean aurkezteko modukoak izan behar dute.
Bekaren xedea da euskal kulturaren baitako sormen-lanak bultzatzea, eta, 23. Korrikatik aurrera, Korrika Kulturaleko ekitaldi nagusia taxutzea. Beka 23.000 eurokoa izango da, eta 23. Korrika Kulturaleko egitarauaren barruan aurkeztuko da, 2023ko azarotik 2024ko apirilera, hain zuzen.
