BILBO/MADRIL, 21 (EUROPA PRESS)
Poesiaren Espainiako Sari Nazionaleko epaimahaiak Miren Agur Meabe idazle bizkaitarra proposatu du aurtengo saridun izateko, Susa argitaletxearekin kaleratutako 'Nola gorde errautsa kolkoan' lanagatik, Kultura eta Kirol Ministerioak jakinarazi duenez. Saria 20.000 eurokoa da eta lehen aldiz eman diote euskaraz idatzitako poesia bilduma bati.
Epaimahiaren arabera, "euskal poeta garaikide handienetako baten heldutasuneko poema liburua da" lan saritua. "Memoria liburu gisa hasten dena hedatzen doa, eta hainbat ahots, estilo eta tonu barne hartzen ditu", gaineratu du.
Era berean, epaimahaiak nabarmendu duenez, "desioari, heriotzari, nostalgiari eta denboraren igarotzeari buruzko gogoetak hitzen bidez gozamena bilatzearekin uztartzen dira".
"Kontrapuntu gisa, dimentsio ironikoa eskaintzen du bere hizkuntzan eta islatzen duen jarreran. Hamar urtean zehar egina, urteen joanaren garraztasuna eta bizitasun eta freskotasun hautsezina maisuki biltzen ditu", adierazi du epaimahaiak.
Miren Agur Meabe idazle eta itzultzailea Lekeition jaio zen, 1962an. Irakasle diplomatu zen, Gizarte Zientzietako espezialitatean, eta Euskal Filologian lizentziatu. Giltza-Edebé taldean argitalpen zuzendaritza eta kudeaketan aritu da. Euskaltzaina da 2006tik.
Batez ere poesia eta haur literatura idatzi ditu. Helduentzako narrazioak ere landu ditu. 'Azalaren kodea' poema liburuak Espainiako Kritikaren Sari Nazionala jaso zuen 2000n, eta 2010ean argitaratu zuen 'Bitsa eskuetan' poema bildumak euskarazko Poesia Kritikaren Saria.
2002. urtean Haur eta Gazte Literaturako Euskadi Saria jaso zuen 'Itsaslabarreko Etxea' lanari esker, baita 2007an ere, 'Urtebete itsasargian' obrarekin. Prosa eta poesia uztartzen dituen 'Mila magnolia-lore' (2010) bilduma IBBY erakundearen Ohorezko Zerrendan sartu zuten, eta hurrengo urtean Haur eta Gazte Literaturako Euskadi Saria jaso zuen berriro 'Errepidea' lanari esker. 2020an 'Begiak zerumugan' kaleratu zuen.
