BILBO, 15 (EUROPA PRESS)
Remei Sipi idazle eta Afrikako emakumeen aldeko ekintzailea, Amaia Gorostiza enpresaburu eta Eibar Kirol Elkarteko presidentea, Juan Antonio Urbeltz antropologo eta folklorista, Jose Barreira azken 40 urteotan Euskadin bizi den industrialari galiziarra eta Bilboko Mediku Zientzien Akademia dira 2020. urteko Sabino Arana saria jasoko dutenak.
Covid-19aren pandemiaren eraginez, sari emate ekitaldia ohi bezala Arriaga antzokian izan beharrean, fundazioaren egoitzan egingo da, Bilbon, urtarrilaren 31n, 12:00etan. Aldaketaren arrazoia da beharrezko prebentzio neurri guztiak hartzea eta jende pilaketa ahalik eta gehien mugatzea. Ekitaldia 'streaming' bidez eskainiko da Sabino Arana Fundazioaren webgunean (www.sabinoarana.eus).
Mireia Zarate Sabino Arana Fundazioko presidenteak eta Ignacio Etxeberria erakundeko idazkariak aurkeztu dituzte aurtengo edizioan saritutako pertsonak eta erakundeak, ostiral honetan egindako agerraldian.
Adierazi dutenez, Sabino Arana Fundazioak Remei Sipi saritu nahi izan du, "feminismo militantearen esparruan eta, zehatzago esanda, Afrikako emakumeen aldeko borrokan diharduen ekintzaile nekaezina" aintzatesteko. Halaber, Amaia Gorostizak saria jasoko du "enpresaren arloan zein futbolaren munduan eginiko kudeaketa eredu bikainagatik".
Bestalde, Juan Antonio Urbeltzek "tradiziozko herri kultura ikertu, aztertu eta zabalduz, 50 urtetan euskal kulturari egindako ekarpen zabal eta oparoa" ere aitortuko du Sabino Arana Fundazioak. Jose Barreirari dagokionez, "gogo ekintzaileagatik eta Euskadiko hainbat sektoretan (garraioa, siderurgia, logistika, energia berriztagarriak, ostalaritza eta hotelak) enpresa ekimen arrakastatsuak sustatzen eta zuzentzen erakutsi duen gaitasun ezagunagatik" sarituko dute.
Azkenik, Sabino Arana Fundazioak Bilboko Mediku Zientzien Akademia aintzatetsi eta saritu nahi izan du aurten, "lehen mailako erreferente soziosanitarioa baita, Bizkaiko gizon-emakumeen osasunaren, ongizatearen eta bizi-kalitatearen alde egindako 125 urtetik gorako ibilbide luze eta emankorragatik".
Sabino Arana sariak urtero ematen dira, gizarteari zerbitzua emateko gaitasun eta arduragatik nabarmentzen diren pertsona ospetsuak, erakundeak edo taldeak aintzatesteko.
