BILBO, 25 Ene. (EUROPA PRESS) -
Sabino Arana Sarien 2019ko ekitaldia ospatuko da igandean, urtarrilaren 26an, Bilboko Arriaga antzokian, Iñigo Urkullu Eusko Jaurlaritzako lehendakaria buru dela, Sabino Arana Fundazioak ostegun honetan iragarri duenez.
Kultur ekitaldiaren 31. edizioa eguerdiko 12:00etan hasiko da, eta Saski Baskonia saskibaloi taldea, Ternua Gruop kirolean eta modan espezializatutako euskal enpresa taldea, Naizen Euskal Herriko adingabe transexualen familien elkartea, Andres Urrutia notario eta euskaltzainburua eta Gilles Simeoni Korsikako Kontseilu Exekutiboko burua sarituko ditu.
Saski Baskoniaren aldetik bere presidente Josean Querejetak jasoko du saria, Ternua Groupen aldetik Juan Luis Lasa presidenteak, eta Naizen elkartearen aldetik Bea Sever bozeramaileak, elkarteko zenbait umerekin batera.
Urkullurekin batera, agintari, pertsona esanguratsu eta aurreko edizioetako saridun ugarik baieztatu dute dagoeneko ekitaldian parte hartuko dutela. Zehazki, aurreko ekitaldietako saridunei dagokienez, Joaquín Achucarro pianista (Sabino Arana Saria 2014an), Leopoldo Zugaza editorea eta kultur eragilea (2015), Luis Crovetto Bizkaiko Elikagaien Bankuko kidea (2013), Javier Mata Bultz Lan enpresakoa (1999), Pablo Gonzalez Gorabide erakundeko zuzendari kudeatzailea (2012), Joserra Plaza Gerrako Berriemaileak taldekoa (2003) eta Fernando Izagirre, DYA erakundeko presidentea (1991) egongo dira igandeko ekitaldian, besteak beste.
Politika, erakunde eta unibertsitate arloetako hainbat ordezkari ere izango dira igandean Arriagan. Xabier Madariaga kazetariak gidatuko du ekitaldia eta Euskadi Brass taldeak girotuko du musikarekin.
