BILBO, 22 (EUROPA PRESS)
Euskadiko Udalen Elkarteak (Eudel) "Administrazio Kontrataziorako Eskuliburua" argitalpenaren edizio eguneratua plazaratu du, Sektore Publikoko Kontratuen Lege berrira egokituta. Eskuliburua administrazio baldintzen ereduzko 22 orriren bilduma bat da, eta kontratazio prozesuen segurtasun juridikoa handitzeko eta udalen izapide administratiboak arintzeko helburua dauka.
Eskuliburua astelehen honetan aurkeztu die Eudeleko elkarteburu Imanol Landak udalei, Bilbon egindako informazio saio batean. 250 kargudun baino gehiago egon dira bertan, gehienbat langile politiko eta teknikoak, kontratazio zerbitzuetakoak nahiz zerbitzu juridikoetakoak, bai eta kontu hartzaileak eta udal idazkariak ere.
"Eudelek udalekin egiten du lan, udal kudeaketa berritzeko asmoz, hurbilagoa eta eraginkorragoa bilakatuta. Orain, eskuragai jarri dugu administrazio izapideak errazteko eta kontratazio prozesuetan segurtasun juridiko handiagoa emateko tresna berria. Kontratazioa funtsezko gaia da udalen jardueran, eta ezinbestekoa da herritarrei kalitate goreneko zerbitzuak eman ahal izateko", adierazi du Landak.
Horrela, indarrean jarri berri den Sektore Publikoko Kontratuen 9/2017 Legeak sartutako aldaketa garrantzitsuek beharrezko egin dute udaletan ohikoa den eskuliburua arautegi berrira egokitzea. Eudelek material hau eguneratu du pixkanaka, kontratazio publikoaren arloko arautegia aldatu ahala.
Eskuliburua administrazio baldintza berezien ereduzko 22 orriren bilduma bat da, tokiko administrazioaren kontratu ohikoenei eta horien prozesuei buruzkoak, hala nola lanak, hornidurak, zerbitzuak eta zerbitzuak ematea.
Zehazki, kontratu txikiak behin eta berriro aplikatzeari buruzko 8/2017 Legearen arautegi murriztaileak eragiten dio gehien toki administrazioen funtzionamenduari, eta, udalentako langileen artean sortu diren zalantza horiei guztiei erantzuteko asmoz, Eudelek informazio saioa egin du astelehen honetan, 250 politikari eta teknikari baino gehiagorentzat.
Saioa Miguel García Rescalvok bideratu du; García Rescalvo INAPeko irakaslea da, bai eta herri administrazioen aholkularia ere, Estatu mailan ospe handikoa. "Kontratu txikiak. Errepikatzen diren prestazioak kontratatzeko esparru-hitzarmenen alternatiba" hitzaldian, udalen galdera ohikoenei erantzuten saiatu da. Gainera, zenbait konponbide praktiko eskaini ditu kontratu txikien izapidetzea errazteko, betiere, legea errespetatuz eta, aldi berean, aplikatzeko eraginkorra izan dadin.
