DONOSTIA, 20 Ago. (EUROPA PRESS) -
Irailean Donostian egingo den 'Oroimenaren Bidea' bisitaldi antzeztuetarako izena emateko epea zabalik dago. Ez dago ordaindu beharrik, doan izango baita, baina izena eman beharra dago.
Donostian altxamendu militar frankistan gertaturikoa gertutik ezagutarazteko asmoz antolaturiko bisita gidatu antzeztuak berriro jarri ditu abian Donostiako Udaleko Eskubide Zibiletako Atalak. Hala, bi antzezlek, gizonezko bat eta emakumezko bat, garai hartan donostiarrek bizi izandako uneak kontatzen eta antzezten dituzte.
"Gerra zibilaren hondamendiak zuzenean edo zeharka pairatu zituzten pertsona guztiei eginiko omenaldia dira bisitak. Oroimenean gure historiaren kapitulu triste bat izan zuten lekuak eta pertsonaiak gordetzen laguntzen du horrek", adierazi du Duñike Agirrezabalaga Berdintasuneko, Elkartasuneko eta Eskubide Zibiletako zinegotzi ordezkariak.
Ibilbidea Donostiako Easo plazan hasiko da, eta San Jose ikastetxetik, Askatasunaren hiribidetik, Maria Cristina hotelaren kanpoaldetik eta Kursaal zubitik jarraituko du. Iraileko larunbatetan izango dira bisitak, 12:00etan eta 18:00etan. Hilaren 7an eta 21ean, gaztelaniaz, eta, hilaren 14an eta 28an, euskaraz. Bakoitzak ordu eta erdiko iraupena izango du eta antzezpen bakoitzeko 25 pertsonak har dezakete parte.
Parte hartzeko izena www.komazk.com/erreserbak/DSS-1936.html web orrian eman daiteke. Informazio gehiago nahi izanez gero, 943 456 000 telefono zenbakira deitu daiteke, edo bestela, mezu bat bidali info@komik.com helbidera.
