PONTEVEDRA, 25 Jun. (EUROPA PRESS) -
Andrés de V.F., o mozo que en 2015 agrediu a Mariano Rajoy en Pontevedra, foi absolto polo ataque ao coordinador da agrupación local en Pontevedra de Vox, Juan Manuel Rosales Pérez.
O avogado deste mozo, Evaristo Montoya, explicou que as partes, antes de entrar en sala, alcanzaron a un acordo económico para non chegar a xuízo por este delito leve. "As partes deciden non entrar e o que se consegue é a absolución", indicou este letrado.
O parte forense recolle que a vítima sufriu cortes en fazula e beizos e tamén quedou un ollo amoratado. Por estas lesións marcouse unha cantidade de diñeiro que non supera os 400 euros.
O coordinador de Vox en Pontevedra foi atacado cando estaba a repartir propaganda electoral nunha mesa informativa instalada xunto á praza de abastos de Pontevedra.
"Xa non hai acusación, unha vez que o denunciante non a mantén", agregou o avogado. Andrés de V.F. saíra en liberdade vixiada en 2017 após cumprir dous anos nun centro de menores pola puñada ao expresidente do Goberno.
"El era menor, cumpriu esa pena e isto xa é unha situación de maior, é un delito leve e non lle afecta para nada", comentou o seu representante legal.
Hoxe este mozo quixo pedir perdón ao denunciante. O seu avogado indicou que no momento da comisión dos feitos Andrés "había bebido e cando un bebe non está en condicións, non ten a capacidade para poder razoar o que está a facer".
De feito, o seu avogado lembrou que "se arrepentiu ao momento" e acudiu de maneira voluntaria á comisaría para recoñecer os feitos.