A CORUÑA, 19 Sep. (EUROPA PRESS) -
A alcaldesa da Coruña, Inés Rey, contestou este sábado ao Goberno de Ceuta que "ninguén está por encima da lei", após recibir a petición formal para a cesión da estatua que foi retirada en 2010 da praza herculina, agora denominada Praza das Atochas, e que, na actualidade, permanece nunha dependencia municipal.
O Concello coruñés non só impedirá o traslado desta estatua, senón que porá en coñecemento da Xustiza o que, remarca, parece unha vulneración da Lei de Memoria Histórica, pola que "os escudos, insignias, placas e outros obxectos ou mencións conmemorativas de exaltación persoal ou colectiva do levantamento militar, da Guerra Civil e da represión da Ditadura, deberán ser retiradas dos edificios e espazos públicos".
O goberno coruñés lembrou ao Goberno da Cidade Autónoma de Ceuta que a Lei de Memoria Histórica é "igual para todos".
"Se a estatua de Millán Astray foi retirada da nosa cidade, de ningún modo váiselle a ceder a ningunha outra administración para a súa exhibición. Desde o goberno local da Coruña defendemos a aplicación da Lei de Memoria Histórica e calquera outra administración que pense que está por encima da lei está equivocada", avisou.
"REPARAR A MEMORIA HISTÓRICA"
A rexedora asegura que non é o único caso para "reparar a memoria histórica" da cidade, e lembrou "o espolio dos bens públicos" levado a cabo na cidade pola ditadura franquista, como é o caso da Casa Cornide, pola que "o Concello da Coruña segue loitando para que se lle devolva aos coruñeses o que é seu".
Tamén lembrou que o Concello coruñés foi parte da denuncia que recentemente se resolveu de forma favorable a que os herdeiros do ditador Francisco Franco devolvesen o Pazo de Meirás.
