SANTIAGO DE COMPOSTELA, 25 Mar. (EUROPA PRESS) -
A coalición En Común-Unidas Podemos presentou de maneira oficial a súa candidatura ás eleccións xerais do 28 de abril con tres eixos fundamentais no seu programa: "Feminismo, ecoloxismo e pacifismo". Despois de desvincularse de En Marea, que concorrerá en solitario aos comicios, En Común-Unidas Podemos adiantou que "de aquí en diante" non vai pronunciar "unha palabra do pasado" nin dos problemas internos desta organización.
O local do Instituto Campus Stellae en Santiago foi o lugar escollido para anunciar definitivamente as cabezas de lista da coalición: o secretario xeral de Podemos Galicia, Antón Gómez-Reino, pola Coruña; a ex coordinadora nacional de Esquerda Unida Yolanda Díaz, por Pontevedra; a exconcelleira no Concello de Ourense Ledicia Piñeiro, por esta provincia; e o membro de EU Vanessa Somoza, por Lugo.
Neste contexto, os candidatos, e en especial Díaz e Gómez-Reino reivindicaron o seu traballo na Cámara baixa durante a anterior lexislatura e baixo a marca de En Marea. No entanto, ao ser preguntados sobre se cren que a súa escisión lles pasará factura, o número un por Pontevedra anunciou que "En Común non vai pronunciar unha palabra do pasado".
Ademais, Yolanda Díaz insistiu en que "dá igual o nome" co que se presenten porque a cidadanía, asegurou, "sabe perfectamente" quen son e "a quen votar". En calquera caso, e en referencia velada á candidatura dos de Villares, desexou "moita sorte a todos e todas".
