SANTIAGO DE COMPOSTELA, 25 Mar. (EUROPA PRESS) -
Efectivos de extinción traballan nun incendio forestal rexistrado no municipio lucense de Muras e que afecta a unhas 75 hectáreas de superficie, mentres que quedaron sufocados os lumes rexistrados esta fin de semana nos concellos ourensáns de Chandrexa de Queixa e Lobeira.
Segundo informou a Consellería do Medio Rural, o incendio de Muras localízase na parroquia do Burgo e afecta a unhas 75 hectáreas de monte raso.
Este lume comezou ás 20,35 horas deste domingo e quedou controlado ás 6,19 horas deste luns. Foron mobilizados catro axentes, sete brigadas, cinco motobombas e unha pa.
Pola súa banda, o incendio forestal que se iniciou este domingo ás 12,00 horas na parroquia de Fitoiro, en Chandrexa de Queixa, e quedou controlado sobre as 17,25 horas quedou extinguido ás 23,20 horas da mesma xornada após queimar unhas 25 hectáreas, dúas de arborado e 23 de superficie rasa.
Mentres, o lume declarado sobre as 23,50 horas deste sábado e controlado pouco antes das 13,10 horas deste domingo no municipio ourensán de Lobeira, na parroquia de San Xes de Vilariño, quedou extinguido desde as 20,35 horas. Neste caso o incendio queimou unhas 25 hectáreas de monte raso no parque natural do Xurés.