SANTIAGO DE COMPOSTELA, 6 Jun. (EUROPA PRESS) -
O Equipo Pegaso da Comandancia da Garda Civil da Coruña denunciou a un veciño da Coruña, de 41 anos, que realizou numerosos voos cun dron da súa propiedade da marca DJI Phantom 4 advance dentro do espazo aéreo controlado do aeroporto de Alvedro (A Coruña).
Segundo explica nun comunicado, voouno desde a fase cero do confinamento até a data actual, chegando a facelo a 350 metros de altura e a máis de 800 metros de distancia horizontal do piloto, "unha actitude neglixente" posto que a esas alturas xa se comparte espazo aéreo con aeronaves tripuladas.
O real decreto que regula o uso de drons non permite voar a máis de 120 metros e o dron sempre ten que estar ao alcance visual.
A Garda Civil indica que, aínda que o denunciado voaba o seu dron de forma recreativa, coñecía a lexislación aeronáutica e era "consciente" do seu incumprimento, ademais de que a propia aplicación do dron avisáballe cada vez que excedía os límites legais, "facendo caso omiso".
Segundo conclúe, non dispón de licenza de piloto para drons, nin cumpría con ningún dos requisitos obrigatorios requiridos pola Axencia Estatal de Seguridade Aérea para realizar este tipo de operacións.
