VIGO, 13 Ago. (EUROPA PRESS) -
Axentes da Policía Local de Vigo detiveron a un home como presunto autor dun delito de ameazas graves, após increpar aos pasaxeiros dun bus urbano e ameazar cunha fouce e un coitelo a axentes policiais.
Segundo informaron fontes do 092, os feitos ocorreron ao mediodía deste luns, cando a sala de comunicacións da Policía Local recibiu un aviso por parte dun condutor de bus urbano, que informaba sobre un individuo que estaba a bordo do autocar, golpeando o mobiliario interior e ameazando ao resto de viaxeiros.
Os axentes desprazáronse até o lugar dos feitos, na zona do Calvario, e observaron como o sospeitoso, ao decatarse da presenza policial, comezou a aporrear a porta do bus, esixindo que lle abrisen para apearse. Cando chegou a patrulla, o home conseguira saír do autocar, e dérase á fuga.
Os policías seguírono a pé e comprobaron que saltaba un muro cara a unha zona chea de maleza. Ao verse perseguido polos axentes, o sospeitoso seguiu saltando varias tapias a través das leiras, facendo caso omiso dos axentes, que tentaban tranquilizalo.
Finalmente, o home chegou a unha leira na que entrou nun galpón e fíxose cunha fouce e un coitelo de 12 centímetros de folla, cos que ameazou aos axentes, á vez que os insultaba.
Despois de contactar coa propietaria da leira, os axentes lograron acceder e, mentres uns policías entraban pola porta principal, outro franqueou o muro e, por detrás, puido saltar sobre o sospeitoso e reducilo.
