SANTIAGO DE COMPOSTELA, 18 Ene. (EUROPA PRESS) -
A Guardia Civil do Posto de Malpica (A Coruña) detivo a dous cazadores veciños da mesma localidade e investiga a outros dous por un delito de lesións debido á malleira propinada a un individuo.
Segundo informou o Instituto Armado, os feitos tiveron lugar o pasado 6 de xaneiro sobre as 11,30 horas na Costa de Asalo do Monte Nariga, en Malpica de Bergantiños.
A vítima atopábase de cazaría cos seus cans e achegóuselle un vehículo todoterreo branco cando, relatan as mesmas fontes, "baixáronse dous mozos" e "un deles comezou a golpealo na cabeza após preguntarlle por uns asuntos persoais e, a continuación, o outro o agrediu por detrás", abundaron.
Pola súa banda, os outros dous homes quedaron no vehículo "sen tentar evitar a malleira, que durou aproximadamente cinco minutos", indicou a Benemérita.
Como consecuencia dos golpes, a vítima foi trasladada ao Complexo Hospitalario Universitario A Coruña (Chuac) e, posteriormente, tivo que ser operada do brazo esquerdo por unha fractura ósea.
As dilixencias instruídas en relación con estes feitos foron remitidas ao xulgado de garda da localidade coruñesa de Carballo.
