SANTIAGO DE COMPOSTELA, 16 May. (EUROPA PRESS) -
O novo vicepresidente segundo da Xunta, Diego Calvo, marcouse como obxectivo "tentar mellorar o legado" que deixa o presidente da Xunta, Alfonso Rueda, nas áreas de responsabilidade que asume o político de San Sarduniño (A Coruña), única cara nova no Executivo autonómico.
Na súa estrea como membro do Goberno galego, Calvo foi o encargado de abrir a quenda de intervencións no acto de toma de posesión da nova cúpula da Xunta, que tivo lugar na mañá deste luns na sede do executivo do Pazo de Raxoi, en Santiago.
O aínda vicepresidente do Parlamento e barón provincial do PP na Coruña é a única novidade no Consello da Xunta, onde sentarán xunto a Rueda o resto de conselleiros que acompañaban ao presidente saínte Alberto Núñez Feijóo.
Calvo asume a vicepresidencia segunda asociada á Consellería de Presidencia, Xustiza e Deportes, áreas que, até agora, practicamente coinciden coas que tiña o novo presidente, que leva consigo as responsabilidades en Turismo.
"O meu obxectivo será, presidente, tentar mellorar o legado que deixas na Consellería de Presidencia", sinalou o novo número tres da Xunta durante un discurso no que se comprometeu a que "se algo non vai faltar" no seu departamento "vai ser o traballo".
Coa meta de "tentar solucionar os problemas" dos galegos e que estes "estean orgullosos do seu goberno", Diego Calvo asume o "reto" de formar parte do Goberno autonómico, novo paso nunha traxectoria política que o levou a encabezar a Deputación da Coruña e ser vicepresidente do Parlamento autonómico.
Precisamente, Calvo evocou á "xente" que o acompañou nas distintas responsabilidades desempeñadas até a actualidade, á vez que lembrou á súa familia, amigos da súa localidade natal San Sadurniño e "todas" as persoas "que levan compartindo" as súas "voltas ao sol".
"Son consciente de que son unha persona con sorte. Aquí podería estar calquera outra persona, ou hai moitas persoas que poderían estar a desenvolver estas funcións", incidiu o 'barón' do PP na provincia coruñesa nas súas primeiras palabras como membro do Goberno, ao que chega co ánimo de encarar os "novos retos" que se lle presentan.
"Se algo non vai faltar nesta consellería vai ser o traballo. Non se se serán máis acertos ou erros, espero que máis acertos; pero traballo non vai faltar", aseverou Calvo.
