SANTIAGO DE COMPOSTELA, 25 Feb. (EUROPA PRESS) -
A conselleira de Infraestruturas, Ethel Vázquez, afeou este martes ao Goberno central o seu "posicionamento en favor de Audasa" no xuízo polo cobro de peaxes abusivas durante as obras de Rande e instoulle a "tomar nota" do fallo, que condena á concesionaria a devolvelos.
"A Xustiza falou e deu unha mensaxe clara: que os usuarios da AP-9 teñen dereito a un servizo de calidade por autoestradas que son de peaxe", dixo a conselleira, a preguntas dos medios.
Fronte a iso, explicou "o Goberno do Partido Socialista ten que tomar nota e reflexionar sobre ese posicionamento que fixo a favor da concesionaria no xulgado", así como "velar polos intereses dos usuarios".
"Lamento profundamente que, neste xuízo, o Goberno socialista de Madrid intervise en favor da concesionaria. É unha mostra máis da falta de sensibilidade do Goberno en relación cos intereses dos usuarios da AP-9", dixo Vázquez, para quen o PSOE no Goberno central "traballa con moito máis entusiasmo polos intereses de Audasa que polos intereses dos usuarios da AP-9".
Do mesmo xeito, a conselleira instou tamén ao BNG a "reflexionar" por dar o seu voto a "un Goberno que o que fixo foi apoiar á concesionaria nese xuízo e non aos usuarios", o que viu "unha mostra máis de que ese acordo co BNG é un cheque en branco para formar un Goberno e que o PSOE faga o que queira sobre a AP-9".
