O parlamentario e a súa compañeira Yolanda Díaz defenden o seu respaldo ao proxecto de PGE e explican que non se rexen por disciplina de voto
A CORUÑA, 15 Feb. (EUROPA PRESS) -
O deputado de En Marea no Congreso Miguel Anxo Fernán Vello reprochou á súa compañeira de grupo, Alexandra Fernández --ambos de Anova-- "deslealdade" con este grupo parlamentario. Mentres, defendeu o seu voto a favor do proxecto dos Orzamentos Xerais do Estado (PGE nas súas siglas en castelán).
"Nunca votarei cun PP que en Galicia tortura sanitariamente á xente", sentenciou nunha comparecencia, xunto á tamén deputada de En Marea Yolanda Díaz, sobre o anuncio de adianto electoral para o 28 de abril.
Ademais, recalcou que, desde En Marea, non serán "corresponsables de abrir a porta á ultradereita", en alusión á posible entrada de Vox nos próximos comicios xerais.
Respecto do seu respaldo ao proxecto de PGE, dixo que foi "libre" votando e que exerceu o seu voto "en conciencia". "Ninguén me ordenou nada", sinalou.
En similares termos, pronunciouse a deputada Yolanda Díaz quen explicou que o grupo de En Marea no Congreso non se se "rexe" pola disciplina de voto. "Tómanse por consenso", manifestou sobre os acordos que adoptan.
ALLEA AO GRUPO PARLAMENTARIO
Sobre o voto en contra ao proxecto de Orzamentos Xerais do Estado de Alexandra Fernández, Miguel Anxo Fernán Vello asegurou que "leva meses allea ao grupo parlamentario de En Marea".
En concreto, expuxo que leva "cinco meses sen participar" nas reunións do grupo. "Non tivo participación nas 300 emendas rexistradas --aos orzamentos-- nin no desenvolvemento da negociación co Goberno".
"Alexandra practicou co grupo de En Marea absoluta deslealdade", recalcou. Mentres, Yolanda Díaz explicou que a deputada comunicou ao grupo parlamentario o pasado 11 de setembro que "se retiraba" do mesmo, unha decisión que lamentou. "As diferenzas políticas dirímense politicamente", engadiu.
Na votación, só a deputada de En Marea Alexandra Fernández respectou a dirección do Consello das Mareas --máximo órgano de decisión entre plenarios-- e votou 'non' ao proxecto de Orzamentos Xerais do Estado, cuxa devolución tamén apoiou o PP, Cs, ERC, PDeCAT, CC, UPN, Bildu, Foro e outra deputada de En Comú adscrita a Unidos Podemos, Marta Sibina.
