'En Galicia si', lema de campaña do PP

Miguel Tellado e MarÃa Luisa PiÃeiro presentan a campaÃa do P
EUROPA PRESS/David CabezÃn @ PPdeG
Actualizado 01/09/2016 20:42:38 CET

Tellado cre que "con Feijóo é posible" a terceira maioría absoluta consecutiva, polo que pide aos seus que se mobilicen

SANTIAGO DE COMPOSTELA, 1 Sep. (EUROPA PRESS) -

'En Galicia si' é o lema de campaña elixido polo PPdeG, co que pretende evidenciar que a comunidade foi "unha excepción de estabilidade e rigor" que pode continuar a partir do 25 de setembro.

Anunciárono este xoves o secretario xeral do PPdeG, Miguel Tellado, e a vicesecretaria de Acción Electoral, María Luisa Piñeiro, nunha rolda de prensa na que tamén presentaron o cartel, no que o candidato popular á reelección, Alberto Núñez Feijóo, figura dentro do mapa autonómico e o logo do partido queda relegado.

Nun momento no que, a nivel nacional, "prima o non e o bloqueo", en palabras de Tellado, o PPdeG busca que Galicia "diga si a ter un goberno estable". "Os galegos non queren negativas, vetos, bloqueos, liñas vermellas... Queren un goberno forte que traballe para mellorar a súa calidade de vida", interpretou.

Se co lema os populares aspiran a trasladar que "é posible manter o rumbo e seguir a senda trazada" nas dúas lexislaturas de Feijóo á fronte de San Caetano, o cartel pon o acento na identificación do mandatario coa comunidade. "Feijóo sempre lle dixo si a Galicia, Feijóo sempre elixiu Galicia", proclamou Tellado.

"Contra o que algúns prognosticaban, ou mesmo desexaban, Feijóo quedou aquí", abundou, antes de reivindicar que "puxo a Galicia por riba de todo" e está "unido" a ela "de forma indisoluble".

DA CRISE ECONÓMICA Á POLÍTICA

Neste escenario, o secretario xeral do PPdeG apelou aos seus votantes para que se "mobilicen", pois teñen na súa man "asegurar un goberno estable" e "evitar caer en mans de políticos irresponsables".

"Feijóo estivo en Galicia para sacala da crise económica na que outros a meteron, e segue en Galicia para evitar que caia agora nunha crise política, que é o que oferta o multipartito que concorre fronte a nós", formulou, para trasladar que co actual presidente "é posible seguir avanzando".

No lado oposto dun "goberno estable e un partido unido baixo o liderado" de Feijóo situou a "lea" que representan "os partidos do non", que "nin se entenden entre eles nin entenden a Galicia". Son formacións, insistiu, instaladas "no "bloqueo, o odio, a animadversión e a división permanente".

Neste escenario, o dirixente popular mostrouse convencido de que, aínda que "é difícil" conseguir unha terceira maioría absoluta consecutiva, "con Feijóo é posible".

CAMPAÑA "EN POSITIVO"

Ao respecto, a vicesecretaria de Acción Electoral do PPdeG advertiu de que o reto só se poderá alcanzar "cunha alta porcentaxe de participación" daquelas persoas que queren para Galicia "un goberno estable e non unha lea ingobernable".

É por iso que os populares destacarán o seu balance de goberno fronte a PSdeG e BNG, que -dixo Piñeiro- "aínda a avergüenzan" do seu paso pola Xunta, e á Marea, que "defraudou" coa súa xestión das cidades de Santiago, A Coruña e Ferrol.

Así pois, mitins e actos sectoriais combinaranse con reunións con colectivos e paseos para lograr o "contacto directo" coa xente. O primeiro grande acto, na praza de touros de Pontevedra, terá lugar o sábado día 10.