SANTIAGO DE COMPOSTELA, 18 Ago. (EUROPA PRESS) -
A nova deputada galega no Congreso por Ciudadanos María Vilas, que substituirá á lucense Marta Rivera de la Cruz despois de que esta sexa nomeada nova conselleira de Cultura e Turismo da Comunidade de Madrid, destacou que será a "voz dos coruñeses e dos galegos" na capital española.
Así, este domingo nunha entrevista na Radio Galega recollida por Europa Press, quixo felicitar a Marta Rivera polo seu novo posto e subliñou que foi un "privilexio" acompañala durante a pasada campaña das eleccións xerais, xa que Vilas era a número dous das listas de Ciudadanos pola provincia da Coruña.
Preguntada sobre a situación política actual española, lamentou que o Goberno estea "paralizado" debido, ao seu xuízo, á súa "mala xestión". "Dixemos por activa e por pasiva que os votos de Ciudadanos non facilitarían o Goberno de Pedro Sánchez e cumprímolo", apostilou, polo que sinalou que traballará para "pór en marcha o Executivo canto antes".
Tamén foi cuestionada por se vería con bos ollos acudir ás eleccións xunto co PP baixo unha marca común como 'España suma', ao que respondeu que "non está no ADN de Cs diluírse con outro proxecto", xa que o seu partido é "reformista e rexenerador".
"Navarra suma tiña unhas características particulares e non extrapolables", resolveu a que tamén foi cabeza de lista de Cs ás municipais en Santiago, quen sentenciou que en Galicia tampouco se levará a cabo.
MARTA RIVERA
Todo iso após coñecerse este sábado que a xornalista, escritora e deputada por Ciudadanos no Congreso Marta Rivera, nacida en Lugo, será a nova conselleira de Cultura e Turismo da Comunidade de Madrid.
Rivera, que accedeu á súa acta nas Cortes primeiro por Madrid e logo pola Coruña, renunciará a ela para dedicarse en exclusiva aos labores executivos que desempeñará no futuro Goberno rexional. A seguinte na lista pola provincia coruñesa é a compostelá María Vilas, polo que é o nome natural para darlle a substitución.
