Novagalicia traballa nun plan que inclúe socios privados e unha inxección de capital público para seguir en solitario

SANTIAGO DE COMPOSTELA, 25 May. (EUROPA PRESS) -

Novagalicia Banco traballa nunha proposta para cumprir os requisitos de saneamento e manterse en solitario que inclúe a entrada de investidores privados e unha inxección de fondos públicos. A concreción desa axuda e a achega dos fondos de investimento detallaranse, se prospera esta vía, no proxecto que a entidade debe presentar ante o Banco de España antes do 11 de xuño.

A entidade considera que o segundo decreto de saneamento do sistema financeiro abre novas vías para o seu futuro e formula agora unha substitución do esquema de protección de activos (EPA) que pedían os investidores privados por unha inxección de fondos públicos. Fontes do banco indicaron a Europa Press que os fondos de investimento cos que xa negociara seguen interesados no proxecto con estes cambios.

O efecto de protección ante perdas é "similar" cun EPA e cunha maior presenza de capital público, sostén a entidade, que apunta que este plan debe ser concretado e o Estado debe, pola súa banda, detallar os requisitos e como se acometerán as axudas públicas ás entidades que as necesiten a raíz deste segundo decreto.

A axuda que necesitaría a entidade galega, froito da fusión das antigas caixas, calcularase en función da perda esperada, aínda que o banco non apuntou cifras, á espera de coñecer se o Goberno é favorable a esta alternativa.

Fontes financeiras interpretan que, nun contexto de incerteza, un EPA non aclara a cánto ascenderá a perda, mentres que a fórmula dunha nova inxección de capital deixa pechada a cifra da axuda pública e supón un empréstito que o Estado espera recuperar coa súa futura saída do conxunto de accionistas.

A entidade manifestou que desexa resolver a súa situación "canto antes" e que agora traballa na concreción desta alternativa que, defende, non deixa de ser o plan que defendeu xa en marzo o seu presidente, José María Castellano: unha achega pública e a entrada de investidores privados. En calquera caso, o proxecto debe recibir primeiro o visto bo do consello de administración do banco, que non está previsto para os próximos días. O prazo para entregar a proposta vence o 11 de xuño.

BANCO PÚBLICO

Fontes próximas á entidade sinalan, respecto á posibilidade de agrupar as entidades nacionalizadas nun banco público, que a intención é manterse en solitario e que tal posibilidade de unión non foi formulada á entidade polo Goberno e non é do interese da entidade.

Pola súa banda, o director xeral de Novagalicia, Díaz Arnau, preguntado por esta vía nun acto co conselleiro Javier Guerra, afirmou que o banco, "de momento, mantén os seus plans como proxecto independente". "Teremos que presentalo, como está establecido, antes do día 11 de xuño", dixo e insistiu en que "se diferenciará ben pouco" dos plans enviados en marzo, posto que o novo decreto "non introduciu a ese nivel diferenzas substanciais do anterior".

"Será un proxecto independente, un proxecto autónomo, galego, ao servizo da comunidade das empresas e de todos os galegos,", sostivo e dixo descoñecer "a proposta formal" para o banco público. "De momento, diría que é unha conxectura que apareceu en medios de comunicación; non recibimos unha proposta formal neste sentido nin ningunha formulación e esa probabilidade non está no real decreto, non está nos nosos plans, polo tanto", explicou.