A Cámara lembra que os grupos teñen "liberdade de uso" das súas propias instalacións no Pazo do Hórreo
SANTIAGO DE COMPOSTELA, 14 Dic. (EUROPA PRESS) -
En Marea, PSdeG e BNG acusaron ao Partido Popular de tentar "torpedear" a comisión paralela sobre a situación da sanidade pública que pretenden pór en marcha no Parlamento de Galicia despois da Presidencia da Cámara denegáselle a utilización dunha das salas desta institución para celebrar este encontro.
Así o denunciaron este venres en declaracións aos medios representantes dos tres grupos parlamentarios que o xoves deron a coñecer a súa intención de convocar unha "comisión de investigación alternativa" sobre a sanidade despois do seu abandono da oficial en protesta polo plan de traballo aprobado polo Partido Popular.
En concreto, En Marea, PSdeG e BNG anunciaron que este órgano paralelo botaría a andar o vindeiro luns, día 17 de decembro, coa presenza de Manuel Pereira, o portavoz da familia do home que faleceu o pasado mes de agosto nun PAC da Estrada sen atención médica. Ademais, esta xornada tamén incluiría a comparecencia dunha enfermeira e un médico do colectivo 'Pacs en pé de guerra'.
Para a posta en marcha desta iniciativa "alternativa", os grupos da oposición solicitaron á Presidencia do Parlamento de Galicia unha sala, a F. Con todo, aínda que inicialmente a Cámara si accedeu a facilitar esa sala, nunha notificación enviada na tarde do xoves ao Grupo Parlamentario Socialista, que se encargou de pedir formalmente as instalacións, a Presidencia asegura que os grupos non poden dispor deste espazo.
Respecto diso, a Cámara destacou este venres que os grupos parlamentarios dispoñen de "plena liberdade de uso das instalacións que teñen asignadas en exclusiva" e lembra que a utilización doutros espazos está "condicionada" á autorización previa da Presidencia. "Búscase, sempre, diferenciar claramente a actividade institucional da de carácter partidista", sinala o Lexislativo galego.
Así mesmo, o Lexislativo sinala que con esta decisión busca "evitar equívocos" ante a opinión pública e "diferenciar claramente, tamén respecto ao escenario elixido, os órganos oficiais, formalmente constituídos e que desenvolven as súas sesións con arranxo ao establecido no Regulamento da Cámara, de calquera outra actividade de carácter partidista que os grupos poden organizar, lexitimamente, nas súas dependencias".
A OPOSICIÓN DI QUE SE CELEBRARÁ "SI OU SI"
Despois de coñecer a decisión da Presidencia da Cámara, todos os grupos da oposición convocaron aos medios na mañá deste venres para dar a coñecer a súa postura. O primeiro en comparecer foi o portavoz de sanidade do PSdeG, Julio Torrado, que denunciou o intento do Partido Popular de "frear, torpedear e amordazar" a voz dos familiares do falecido na PAC da Estrada.
O deputado socialista deixou claro que a xornada se vai a celebrar "si ou si" no Parlamento de Galicia. "O PP non é digno de frear ningunha voz por moito que tente torpedear e amordazar a calquera que non poida controlar nin decidir o que vai contar, advertiu.
Ademais, considerou que o límite cruzado polo Parlamento de Galicia supón "un precedente moi perigoso" para impedir dicir cousas que é necesario dicir".
O BNG ESTUDARÁ "MEDIDAS LEGAIS"
Tamén en declaracións aos xornalistas, a portavoz nacional do BNG, Ana Pontón, avanzou que a súa formación estudará "todas as vías desde o punto de vista legal" ante o que considera unha vulneración de dereitos fundamentais como "a liberdade de expresión", o "dereito á participación dos cidadáns" e a "obstaculización do labor da oposición".
"As persoas que están convocadas van estar neste Parlamento e ímolas a escoitar, non se pode tolerar que o Partido Popular crea que o Parlamento de Galicia é a súa casa, o Parlamento non é seu, é a casa de todos os galegos", subliñou a líder do Bloque.
Así mesmo, cualificou os feitos como de "unha gravidade extrema" ao considerar que rompen as "normas de convivencia" da Cámara. "Hoxe o que vemos é ao PP de cara, un Feijóo que se comporta como un auténtico inquisidor e que quere, por todos os medios, que os galegos non coñezan a verdade do desastre que está a causar á sanidade pública", considerou nunha intervención na que citou a dimisión do 80% dos xefes de servizo da Atención Primaria da área sanitaria de Vigo ou as folgas de persoal sanitario.
"ACTUACIÓN ANTIDEMOCRÁTICA"
Pola súa banda, o viceportavoz parlamentario de En Marea, Antón Sánchez, denunciou que o Partido Popular primeiro "vetase" a participación das persoas propostas polos grupos" na comisión oficial para agora "negar un espazo" para celebrar a comisión alternativa.
O deputado de En Marea cualificou de "antidemocrática" esta actuación que, na súa opinión, deixa en evidencia que o PP "algo quere ocultar". "A que lle ten medo o PP?", preguntou Antón Sánchez, que considerou que os populares temen o que poden dicir as persoas que foron vetadas no órgano parlamentario oficial".
"Non lle imos a permitir que nos poñan a mordaza a nós e a unha sociedade que maioritariamente considera que a sanidade debe ser pública e de calidade", concluíu.
