Os grupos solicitarán que o conselleiro de Sanidade ofreza explicacións na Cámara sobre unha decisión "inaceptable"
SANTIAGO DE COMPOSTELA, 25 Nov. (EUROPA PRESS) -
Os grupos da oposición no Parlamento de Galicia --PSdeG, Común da Esquerda, BNG e grupo mixto-- demandaron á Xunta que rectifique a decisión de suprimir o servizo de paritorios no hospital de Verín, o que provocará que, a partir do 1 de decembro, as mulleres da comarca teñan que desprazarse a Ourense para dar a luz.
Así, nas roldas de prensa celebradas este luns en sede parlamentaria, as forzas da oposición avanzaron que rexistrarán unha petición para que o conselleiro de Sanidade, Jesús Vázquez Almuiña, compareza ante a Cámara para ofrecer explicacións sobre un traslado que consideran "inaceptable".
Nas roldas de prensa, os grupos manifestaron o seu rexeitamento a unha decisión que encadran na "política de recortes e desmantelamento" da sanidade pública que atribúen ao Partido Popular. Pola súa banda, fontes de Grupo Común da Esquerda (que este luns non convocou rolda de prensa no Parlamento) confirmaron que se suman á petición.
Á espera da Xunta de Portavoces deste martes, o portavoz parlamentario do PPdeG, Pedro Puy, tamén foi preguntado pola supresión do servizo de paritorio en Verín e a petición de comparecencia do conselleiro do ramo que reclama a oposición.
Respecto diso, indicou que dita demanda acaba de formalizarse e que "se analizará" como "todas as cuestións" que a oposición pon sobre a mesa.
GONZALO CABALLERO
O líder dos socialistas galegos, Gonzalo Caballero, lamentou a "falta de compromiso" da Xunta coa sanidade pública "de calidade", unha postura do Executivo que dirixe Alberto Núñez Feijóo que, segundo o do PSdeG, "afecta con máis gravidade aos concellos pequenos e as zonas de interior" como demostra o caso de Verín.
Neste sentido, apuntou que a responsabilidade de levar ao hospital de Ourense o servizo de paritorios é do actual xerente da EOXI ourensá, Félix Ruibal, quen durante a súa etapa na área de Vigo "fixo que 100.000 vigueses saísen á rúa para protestar contra as políticas sanitarias de Feijóo".
"Feijóo levou a Ruibal a Ourense, castigando aínda máis á provincia", engadiu Caballero, quen instou ao presidente galego a "saír a defender" persoalmente as súas políticas sanitarias e a non ampararse nos responsables das áreas. "O PSOE só confronta co PP, non cos contratados, que non son interlocutores válidos", apostilou.
BNG
Para a líder do BNG, Ana Pontón, a decisión é "inaceptable e inconcibible", polo que trasladou o apoio da súa formación ás mulleres afectadas. "Estamos a asistir a un desmantelamento que se ceba cun servizo tan sensible como é a atención ás mulleres embarazadas", subliñou.
Deste xeito, a portavoz nacional do Bloque preguntouse se "recortar servizos ás mulleres" como a centralización do paritorio de Verín en Ourense, "é unha de mais medidas estrela" da Lei de reforzo de actuacións prioritarias da Xunta.
"VIOLENCIA MACHISTA", SEGUNDO VILLARES
"É un caso de violencia machista institucional", sentenciou o portavoz do grupo mixto, Luís Villares, que alertou de que esta decisión "pon en risco a vida da muller e do bebé", xa que terán que percorrer "unha hora e media en coche ou taxi" desde algún dos concellos máis afastados da comarca para dar a luz.
"A Feijóo gustaríalle que a partir de agora as mulleres dean a luz nas autovías? Quere Feijóo que os nenos nazcan en taxis ou en coches? É esta a sanidade para Ourense que quere Feijóo?", preguntouse Villares, que reclama a dimisión de Félix Ruibal e que o Sergas se bote atrás na decisión.
