Investigan se foi intencionado o choque dun turismo contra unha zona do Hospital de Monforte

Actualizado 23/08/2019 11:08:17 CET

   LUGO, 23 Ago. (EUROPA PRESS) -

   A Policía Local do municipio de Monforte (Lugo) investiga se foi intencionado o choque dun turismo na medianoite deste venres contra unha zona do hospital comarcal, na que nese momento non había ningún persoal nin usuario.

   Así o informaron a Europa Press fontes policiais, que relataron que os feitos sucederon sobre as 00,27 horas deste venres cando un vehículo impactou contra unha porta lateral do Hospital de Monforte, onde se sitúa o servizo de rehabilitación.

   As mesmas fontes indicaron que, salvo o condutor que resultou ferido, non houbo persoas afectadas, pero rexistráronse diversos danos materiais nesa área hospitalaria, en cuxo interior quedou o vehículo sinistrado, que danou un tabique.

   O condutor, o home J.L.L.S., de 37 anos, foi ingresado no propio Hospital de Monforte, investigado en relación cos feitos, confirmaron as mesmas fontes policiais.

   A Policía Local abriu unha investigación para solicitar todos os datos e aclarar se se tratou ou non dun accidente intencionado e está á espera de poder tomar declaración ao condutor do vehículo ferido para elaborar o atestadoo que, unha vez concluído, será enviado ao xulgado pertinente.

Contador