O PPdeG asegura que "non ten responsabilidades" na inclusión de veciños do Grove nas listas do PP de Euskadi

SANTIAGO DE COMPOSTELA, 2 Ago. (EUROPA PRESS) -

O secretario xeral do PPdeG, Alfonso Rueda, asegurou hoxe que a súa formación "non ten responsabilidades" sobre a inclusión de varios veciños de Arousa nas listas municipais do PP vasco, tras as conclusións da investigación realizada polo seu partido --xa finalizada e entrega á Fiscalía--. Porén, matizou que, en todo caso, será a xustiza a que teña que ditaminar se hai culpables. "Se é así, depuraremos responsabilidades", engadiu.

Nunha rolda de prensa, o dirixente popular precisou que o seu partido xa finalizou a investigación sobre estes feitos, que afectan xa a 12 persoas. "Xa realizamos o estudo e as conclusións tenas o fiscal. Nós temos que reclamar, agora, que actúe a xustiza na medida en que considere e que se depuren responsabilidades", engadiu.

En todo caso, indicou que, das conclusións das súas propias indagacións, non se desprende que haxa ningún culpable entre o "aparato do PPdeG". Por iso, descartou que, polo momento, se produzan dimisións. "Primeiro haberá que saber o que pasou e logo depurar responsabilidades. Se hai que extremar precaucións, pois as extremaremos", agregou.

Así, indicou que esta situación "non é desexable para ninguén", especialmente, para o seu partido, porque está "directamente afectado" e tamén é un dos "prexudicados" por estas denuncias.

IMPUTADO

Rueda aclarou que a parte "fundamental" desa investigación a realizou o PPdeG do Grove e está asinado polo ex alcalde e actual presidente deste partido na localidade, Miguel Ángel Pérez, que foi chamado a declarar como imputado por parte da Fiscalía. "A imputación é algo normal e iso non quere dicir que haxa acusación contra ninguén", asegurou o dirixente popular ao respecto.

Sobre a posibilidade de modificar o sistema de elección de candidatos para as municipais vascas, indicou que o PPdeG realizou o procedemento "como noutras ocasións". "O que fixemos é intentar favorecer máis esta iniciativa para que se apuntase quen quixese. A partir de aí e se a documentación está completa tramítase", subliñou ao referirse á grande cantidade de solicitudes cursadas dende o PP de Pontevedra.

"Se houbo un engano será o que agora queremos que se descubra, se depuren e esixan responsabilidades, porque o primeiro afectado é o PP", engadiu.

CONSELLO DE CONTAS

Con respecto ao informe do Consello de Contas, que critica a xestión que o entón goberno do PPdeG realizou en varios departamentos públicos, indicou que as conclusións "non só" refírense ao ano 2004, senón que se estenden ata o 31 de decembro de 2005, cando xa gobernaba o bipartito.

Por iso, advertiu ao vicepresidente da Xunta, Anxo Quintana, quen se mostrou partidario de remitir á Fiscalía as conclusións do Consello de Contas, que teña en conta que pode realizar unha "autodenuncia" porque tamén a investigación afectaría ao seu executivo. "Anímolle a facelo, así nós poderiamos dispoñer, a través da Fiscalía, da información que pedimos e que aínda non nos remitiron", engadiu.

Finalmente, Rueda tamén se felicitou polo "cambio de opinión" do presidente galego, Emilio Pérez Touriño, sobre a proposta do PPdeG de limitar o soldo dos alcaldes. "Non tivo máis remedio que rectificar e agora está a favor de regular esta cuestión porque llelo piden os cidadáns e os propios rexedores", indicou.