LUGO, 26 Mar. (EUROPA PRESS) -
Un octoxenario foi liberado por bombeiros na noite deste mércores despois de permanecen varias horas atrapado baixo o tractor que manexaba cando realizaba traballos nunha leira no concello lucense do Saviñao.
Segundo informou o 112 Galicia, o sinistro produciuse no lugar de Quián, na parroquia de Reiriz. Ás 21,15 horas, unha persona contactou co Centro Integrado de Atención ás Emerxencias (CIAE) para solicitar axuda porque un home quedara atrapado baixo a máquina agrícola que manexaba.
De acordo co relato do alertante, o ferido atopábase nesta situación desde as 15,00 horas. Deste xeito, até o lugar desprazáronse os Bombeiros de Chantada para proceder á liberación do home, que foi atendido por profesionais de Urxencias Sanitarias de Galicia-061.
En concreto, o 061 enviou ao lugar unha ambulancia de soporte vital avanzado para atender ao home J.R.L., de 81 anos de idade, que foi evacuado ao Hospital de Monforte, confirmaron a Europa Press fontes sanitarias.
Ademais dos efectivos do Servizo de Prevención, Extinción de Incendios e Salvamento e do equipo sanitario, participaron neste operativo axentes da Garda Civil.
Por parte do 112 Galicia avisouse tamén aos voluntarios de Protección Civil do Saviñao por se fose necesaria a súa colaboración.
