Concederase nun prazo máximo de 72 horas, segundo a conselleira de Política Social, Fabiola García
A CORUÑA, 30 Jun. (EUROPA PRESS) -
A 'tarxeta moedeiro' da Xunta, para que familias vulnerables poidan comprar alimentos, produtos de hixiene e necesidades básicas, poderase solicitar a partir do mércores, 1 de xullo, segundo anunciou a conselleira de Política Social, Fabiola García, na firma do convenio para a súa xestión coa presidenta da Cruz Vermella Galicia, Carmen Colmeiro, na Coruña.
A responsable autonómica explicou que a concesión da axuda realizarase "nun prazo máximo de 72 horas" e que se tramitará tanto nas sedes da entidade solidaria como nos concellos. O único requisito para acceder ao cartón será, engadiu García, "non dispor doutra axuda da Xunta ou dos concellos".
A Consellería de Política Social calcula que serán 30.000 as familias en situación de vulnerabilidade que accederán a 'tarxeta moedeiro', que poderá utilizarse, engadiu García, en supermercados ou farmacias para "non estigmatizar a ninguén". O orzamento que destina o Goberno galego a esta medida será de 21,7 millóns de euros.
O período de vixencia do cartón será de tres meses e recargarase cada mes, segundo avanzou a conselleira en declaracións aos medios. As familias de tres ou máis persoas percibirán 900 euros en total; as de dúas persoas, 600 e as dunha persona soa, 450 euros. Fabiola García subliñou que se trata dunha axuda "inmediata" mentres se tramitan outro tipo de axudas públicas.
REFERENCIA GALEGA E NACIONAL
A conselleira de Política Social encomiou o labor de Cruz Vermella dicindo que é "referencia a nivel galego e nacional" na firma do convenio que posibilitará que a entidade xestione estes 'cartóns moedeiro' nas súas sedes na comunidade autónoma. "É unha entidade fiel colaboradora da Xunta", finalizou.
A presidenta de Cruz Vermella en Galicia, Carmen Colmeiro, destacou que a pandemia provocou "situación de desamparo" en moitas familias que xa estaban, lamentou, "ao límite da protección". Por iso, lembrou que a entidade puxo en marcha "a maior mobilización de recursos da historia recente" para atender a dous millóns de persoas.
"O proceso da tarxeta moedeiro será rigoroso pero, á vez, rápido", defendeu Colmeiro, sinalando que este sistema de axudas será "moderno" e "eficaz".
