SANTIAGO DE COMPOSTELA, 18 Dic. (EUROPA PRESS) -
O vento deixou este martes refachos de intensidade máxima de 143,3 quilómetros por hora no municipio de Viveiro (Lugo) e de 136,7 en Cedeira (A Coruña) nunha xornada con aviso amarelo por vento forte.
Segundo os datos publicados por Meteogalicia, recollidos por Europa Press, até as 12,00 horas, cando estaba activo o aviso por vento nas provincias de Pontevedra, A Coruña, A Mariña e centro de Lugo, o refacho máximo correspondeu a Viveiro, con 143,3 quilómetros por hora.
Ademais de en Cedeira, noutras localidades con altitude inferior aos 900 metros, superáronse os 130 quilómetros por hora en Vimianzo (A Coruña), con 134,9 quilómetros por hora, mentres que en Cuntis (Pontevedra) alcanzáronse os 128,3 e os 119,6 en Abadín (Lugo).
Mentres, en zonas con altitude maior de 900 metros, o vento deixou refachos máximos de 127,8 quilómetros por hora en Carballeda de Valdeorras (Ourense), de 105,6 en Cervantes (Lugo) e de 104,2 na Veiga (Ourense). Na montaña ourensá e luguesa mantense o aviso até as 15,00 horas deste martes por refachos superiores a 70-80 quilómetros por hora.
CHOIVA
Pola súa banda, a choiva deixou, en zonas de menos de 900 metros de altitude, máis de 48,8 litros por metro cadrado no municipio de Rois (A Coruña) até o mediodía deste martes e 44,1 na localidade coruñesa de Lousame.
Tamén na provincia da Coruña contabilizáronse rexistros destacados en Zas, con 42,3 litros por metro cadrado; 39,5 en Santa Comba; e 37,2 en Vimianzo.
En zonas altas, de máis de 900 metros de altitude, os rexistros de Meteogalicia até o mediodía apuntan 22,5 litros por metro cadrado en Rodeiro (Pontevedra), 12,5 en Muíños (Ourense), 7 en Vilariño de Conso (Ourense) e 4,9 en Pedrafita do Cebreiro (Lugo).
