Anuncia que o goberno local xa solicitou ao Ministerio os permisos, "a pesar de que fai cinco meses negou que fose responsabilidade súa"
VIGO, 22 Nov. (EUROPA PRESS) -
A delegada territorial da Xunta en Vigo, Marta Fernández-Tapias, anunciou este martes que a nova estación de autobuses intermodal da cidade olívica abrirá finalmente o próximo 17 de decembro, após os "novos atrasos" nas obras dos accesos que acumula, segundo denunciou, o Concello.
Así, a representante autonómico falou da comisión de seguimento, convocada pola Consellería de Infraestruturas e Mobilidade, levada a cabo esta mañá, onde o Concello informou de que non poderá abrir o túnel de Lepanto até o 12 de decembro e que segue á espera de que o Ministerio de Transportes lle conceda os permisos.
"O Concello de Vigo explicou na reunión que xa solicitou os permisos ao Goberno central para poder inaugurar os accesos, a pesar de que fai cinco meses negou que fose responsabilidade súa", lamentou Fernández-Tapias.
"Primeiro dixo que non afectaban as súas obras (á apertura da estación), logo que non facían falta os permisos, máis tarde que non tiñamos nada preparado ou que non quería os autobuses pola cidade. É unha permanente negativa polo feito de que é unha obra da Xunta e desmóntase a súa estratexia de que non investimos en Vigo", reivindicou.
Fernández-Tapias criticou que, a pesar de que o alcalde, Abel Caballero, volveu a incumprir "todo o pactado" e que leva "cinco meses enganando á cidadanía", "a Xunta cumprirá o seu compromiso", despois de que o Goberno galego xa tivese acabada a obra o pasado verán. Neste sentido, puxo en valor que as obras xa están finalizadas desde o 10 de xuño, pero despois de todos estes inconvenientes abrirase finalmente en decembro.
"A apertura da estación no centro de Vigo vai supor unha mellora moi importante para os usuarios ao poder desembarcar no centro da cidade e conectar directamente coa terminal de tren", engadiu.
