ANPE, CC.OO. e UXT celebran a oferta, mentres que a CIG a ve "inflada" e culpa á Consellería de ser "alérxica á negociación"
SANTIAGO DE COMPOSTELA, 22 Ene. (EUROPA PRESS) -
A Consellería de Educación, Universidade e Formación Profesional anunciou a convocatoria dunha oferta pública de emprego (OPE) para 2019 que incluirá un total de 2.064 prazas, das cales 1.788 serán de acceso libre e 276 de promoción interna.
A Administración autonómica presentou este martes a oferta aos sindicatos da mesa sectorial de educación non universitaria --CIG, UXT, CC.OO. e ANPE--. En declaracións aos medios, o director xeral de Centros e Recursos Humanos, José Manuel Pinal, valorou que é a OPE "máis ampla do últimos dez anos", que trata de "seguir diminuíndo a taxa de interinidade nos corpos docentes".
En concreto, a oferta inclúe postos en 35 especialidades diferentes. Na educación secundaria serán un total de 834 prazas; para o corpo de mestres de Infantil e Primaria serán 770; ademais de 276 para os grupos A2-A1 de secundaria; 138 para Formación Profesional; 30 de profesores de inglés na Escola Oficial de Idiomas (EOI); e 16 para música e artes escénicas.
Ademais, Pinal destacou como "novidade" as catro prazas para docentes de portugués, o que se corresponde, segundo as súas palabras, co "compromiso" da Xunta de desenvolver a Lei Valentín Paz-Andrade, que, entre outras medidas, promove o ensino da lingua lusa na educación secundaria.
"É unha cifra moi alta que fai posible que o emprego se estabilice", asegurou, para despois vaticinar que a OPE terá unha "favorable acollida". En canto ás datas, avanzou que se celebrarán "a partir de finais de xuño", tendo en conta que a convocatoria será publicada no Diario Oficial de Galicia (DOG) durante este primeiro trimestre de 2019.
REDUCIR A TAXA DE INTERINIDADE
En declaracións a Europa Press, o presidente de ANPE en Galicia, Julio Díaz, celebrou que as oposicións son "unha boa forma" para "consolidar" o emprego no sector e "reducir a interinidade", aínda que pide "non ir deixando vítimas" neste proceso. Por iso, apelou á "prudencia" e pediu unha redución desta taxa de forma "controlada" para "non pór en perigo o traballo da xente que leva moitos anos".
Ademais, Díaz demandou que a fase de promoción interna sexa "realmente" un concurso-oposición, xa que noutras convocatorias, "na maior parte das especialidades só se facía oposición pura e dura", quedando "poucas prazas" reservadas ao concurso.
De igual modo, o representante de ANPE reclamou "que se unan criterios dos tribunais de mesma especialidade" e que os membros dos mesmos sexan seleccionados "por sorteo".
UNHA OPE "HISTÓRICA"
Pola súa banda, o portavoz de CC.OO. na mesa sectorial, José Manuel Fuentes, reivindicou como "histórica" a OPE de 2.064 prazas, xa que "supera a de 2018 en 120" postos máis para o acceso libre. Neste sentido, ve "moi positivo" que a reposición alcance as 660 prazas, segundo as súas cifras.
No entanto, negou que CC.OO. considere "suficientes" as prazas. "Pensamos que tiñan que convocar unhas 100 máis", proseguiu, xa que con esa cifra a taxa de temporalidade se situaría, segundo as súas cifras, en torno ao 5%. Coa OPE anunciada, calcula que se establecerá en torno ao 9%.
Iso obrigará, en virtude dun acordo asinado pola Consellería de Educación coas organizacións, a que "o ano que vén" teña que facer "unha oferta maior" para alcanzar o 5% de interinidade en 2020, aínda que a Administración calcula "dunha forma diferente" esta taxa, afirmou Fontes.
CC.OO. tamén di "botar en falta" unha oferta maior para algunha especialidade como música, artes escénicas e artes plásticas, posto que "non tiveron unha OPE desde fai uns oito anos". Nestes termos, a secretaria do sector educativo de UXT, Paula Carreiro, pediu tamén prazas para formacións como latín, nas que "hai pouco profesorado" que hai que cubrir "con persoal estable".
Así as cousas, a sindicalista saudou que a Consellería "aumentase" o número de prazas desta OPE de 2019 en relación coa cifra que lles foi presentada a semana pasada. Con todo, na mesma liña de CC.OO., UXT considera que o ano que vén deberanse convocar unhas oposicións "como mínimo, como esta", para reducir a interinidade ao compromiso do 5%.
LA XUNTA, "ALÉRXICA Á NEGOCIACIÓN"
O secretario nacional de CIG-Ensino, Suso Bermello, mostrouse "moi crítico e moi duro" coa Consellería, á que culpou de ser "autoritaria", "soberbia" e "alérxica á negociación", xa que eses datos os ten "desde finais de setembro" e o diálogo, ao seu parecer, "teríase que dar desde setembro".
Así mesmo, denunciou que "o único" que fai a Xunta é "reproducir" o acordo sindical alcanzado polo Estado, polo que a Administración autonómica recorre á "artimaña" de vender estas cifras como "históricas" cando en realidade están "infladas": "Non hai de verdade 2.064 prazas".
Finalmente, Bermello censurou que, tras a OPE do ano pasado, "aproximadamente 400 persoas" perderon o seu emprego, polo que alertou do "segundo ERE" que pode supor as oposicións de 2019, xa que as prazas son "similares" para "moitas especialidades". "Hai que buscar unha saída para o persoal interino", apostilou.
