Os responsables sanitarios consideran que non hai transmisión comunitaria e chaman a colaborar para controlar os contaxios
LUGO, 5 Jul. (EUROPA PRESS) -
A Xunta de Galicia tomou a decisión de pechar durante cinco días a comarca da Mariña (Lugo) debido ao brote de COVID-19 rexistrado na zona, que acumula 106 positivos (aínda que sete persoas están curadas, polo que os casos activos son 99). A medida entra en vigor ás 00,00 horas deste luns, 6 de xullo, e prohibirá entrar e saír da área salvo por causa xustificada, reducirá aforos e esixirá o uso de máscara en todos os espazos públicos abertos ou pechados.
Así llo comunicou este sábado por videoconferencia o conselleiro de Sanidade, Jesús Vázquez Almuiña, aos alcaldes dos concellos afectados, un encontro após o que compareceu en rolda de prensa. As medidas, que se publicarán este domingo no Diario Oficial de Galicia (DOG) estarán vixentes até o venres, dous días antes das eleccións autonómicas, convocadas para o domingo 12 de xullo.
Almuiña indicou que a decisión se tomou, de acordo cos técnicos do Ministerio de Sanidade, após o incremento de casos dos últimos días, pero os responsables galegos consideran que non hai unha transmisión comunitaria, posto que os positivos teñen "unha relación clara" e están "case todos" no mesmo concello, que é o de Burela.
Dos positivos só catro están hospitalizados, dos que dous presentan dificultades respiratorias asociadas ao coronavirus e outros dous teñen "patoloxías principais" e, ademais, deron positivo. O resto dos afectados ten síntomas leves. O titular de Sanidade sinalou que se trata maioritariamente de persoas novas e a media de idade é de 35 anos e a idade máis frecuente, de 20. O foco, engadiu, "vincúlase fundamentalmente ao lecer".
De entre as persoas que están confinadas --tanto os que deron positivo como os contactos que están á espera de probas ou que vixían se se presentan síntomas-- un está na cidade de Lugo, pero "está relacionado" co brote da Mariña.
As restricións aplícanse aos 14 municipios que integran o distrito sanitario da Mariña: Alfoz, Barreiros, Burela, Cervo, Foz, Lourenzá, Mondoñedo, Ourol, Ribadeo, Trabada, O Valadouro, O Vicedo, Viveiro e Xove. O Goberno galego pediu a colaboración tanto dos alcaldes e as policías locais como da Delegación do Goberno en Galicia e os corpos e forzas de seguridade do Estado e da Policía Autonómica.
"Considérase necesario neste momento aumentar os niveis de esixencia no distrito sanitario da Mariña para mellorar o prognóstico e adiantarnos á posibilidade dun crecemento exponencial", argumentou o conselleiro, que explicou que se fará unha "avaliación diaria" dos datos durante ese cinco días. Transcorrido ese período avaliarase se se prorroga ou non.
Un dos factores que poden "axudar a controlar o brote", apuntou Almuiña, é que os positivos destes días coinciden co período de incubación desde as celebracións de San Xoán, ao redor de cando cren que se estendeu o virus.
AS NORMAS
O director xeral de Saúde Pública, Andrés Paz-Ares, concretou que queda prohibida a saída e entrada no distrito sanitario salvo por motivos de traballo ou algunha outra causa xustificada. De feito, quen se atope de vacacións estes días na zona e desexen saír, deben facelo nas próximas horas, antes de que entre en vigor o peche, ou permanecer na Mariña os próximos cinco días, dixo Almuiña.
Aínda que dentro da comarca os cidadáns poderanse mover sen restricións, Paz-Ares chamou a evitar "na medida do posible" traslados entre municipios. Quedan fóra das limitacións de mobilidade quen crucen polas autovías e as actividades de transporte, prestación de servizos e comercio e outras actividades económicas.
O uso das máscaras será "obrigado" na vía pública e nos espazos ao aire libre ou pechados "en todo momento". "Desde o momento en que saias de casa é imprescindible que leves a máscara e facer un bo uso dela; ten que ir ben colocada", subliñou.
REUNIÓNS DE ATÉ 10 PERSOAS
Para os locais de lecer nocturno, agregou Paz-Ares, "mantense a demora". As reunións familiares e sociais permítense para até 10 persoas, mentres que os velorios e enterros quedan limitados a 25 persoas (estaban a permitirse até 75), se son en espazos abertos, e a 10 (permitíanse 30) en lugares pechados. Nas comitivas poderán ir até 25 persoas.
Os locais de hostalaría deberán reducir o aforo do 75 ao 50 por cento e non se poderá consumir de pé ou na barra, só nas mesas. Todos os traballadores e clientes deberán levar a máscara, salvo no momento de consumir. Ademais, deberán ter desaloxado o establecemento e pechar a medianoite.
Tamén as piscinas reducen o aforo ao 50 por cento, cun límite de 100 persoas, que non poderán estar en grupos de máis de 10. Do mesmo xeito que na praia, haberá que levar máscara en todo momento, salvo para o baño. Nos areais o espazo por persona pasará de tres a catro metros cadrados e a Xunta suxire aos deportistas que os eviten salvo que poidan garantir as distancias de seguridade.
PECHE DE LUDOTECAS
Os establecementos e locais comerciais en xeral pasan tamén do 75 ao 50 por cento do aforo e, no caso dos centros comerciais, as zonas comúns serán só de tránsito. Pecharán as zonas recreativas infantís e as ludotecas.
O mesmo aforo aplicarase a mercadillos, academias, autoescolas, centros privados de ensino, bibliotecas, arquivos, museos, teatros cinemas e albergues turísticos, espazos todos eles nos que non se poderán reunir grupos de máis de 10 persoas.
MÁIS DE 2.300 PROBAS PCR
O conselleiro de Sanidade lembrou que o primeiro positivo detectouse o pasado 23 de xuño e, desde entón, traballouse para rastrexar aos contactos e fixéronse máis de 2.300 probas PCR na comarca, das que 1.100 foron a usuarios e traballadores de residencias, que deron negativo.
"Seguimos traballando", indicou e pediu que calquera persona con síntomas compatibles se poña en contacto cos servizos sanitarios. Galicia, defendeu, ten un "sistema de detección precoz" e pode realizar a PCR en 24 horas.
O conselleiro pediu á poboación que teña síntomas de COVID-19 ou doutra enfermidade que acuda á sanidade. Se o caso é grave, lembrou, debe chamar ao 061. As consultas específicas relacionadas co coronavirus poden ser atendidas no 900400116 e aqueles que non teñan un médico asignado na zona (por exemplo, quen estea a facer turismo), poden chamar ao 881002021.
