UVIÉU, 9 d'Abril (EUROPA PRESS)
La dirección de Foru Asturies, en relación col recursu presentáu pol partíu sobre los votos recibíos na Xunta Electoral Provincial de los votantes del Censu de Residentes Ausentes (CERA) y tornáu esti llunes pola Xunta Electoral Central, encamentó a los servicios xurídicos l'estudiu correspondiente, col fin d'adoptar una decisión pola Comisión Directiva del partíu, que va reunise a tal fin el próximu día 11 d'abril.
Foru adoptó esta decisión en conociendo l'acuerdu de la Xunta Electoral Central que tornó esti llunes el recursu presentáu por Foru a los 332 votos del Censu de Residentes Ausentes (CERA) escrutaos el pasáu día 28, que llegaron a la Xunta Electoral Provincial per corréu certificáu, en llugar d'al traviés de la Oficina Consular.
Esta resolución de la Xunta Electoral Central confirma poro l'escrutiniu final acordáu'l 28 de marzu, tres el recuentu de los votos de la CERA, y qu'axudicó un escañu más al PSOE, en perxuiciu de Foru Asturies. El repartu de diputaos nel parlamentu autonómicu ye'l siguiente: PSOE 17, Foru Asturies 12, PP 10, IU 5 y UPyD 1. Caltiénse l'empate a 22 ente Foru-PP y PSOE-IU, facilitando la llave de gobiernu a UPyD.
La resolución de la Xunta Electoral dexa claro que nun hai nenguna constancia de que la eliminación d'esos 332 votos, referíos nel recursu de Foru, fuera tener nenguna influencia sobre'l resultáu de les elecciones. "La incidencia (la perda d'un escañu de Foru en beneficiu del PSOE) prodúxose sobre'l conxuntu de la votación de los electores residentes nel esterior, pero non necesariamente de los 332 votos enviaos a la Xunta Electoral Provincial y computaos por ésta", señala'l testu del acuerdu.
Asina, apunta que "nun ye posible saber a ciencia cierta cuántos d'esos 332 votos irregulares correspuenden a la circunscripción occidental y, amás d'ello, si pudieron tener incidencia nel resultáu electoral". Por esti motivu, considera una midida desproporcionada" l'anulación de los 2.531 votos del CERA, que solicitaba Foru Asturies.
IRREGULARIDÁ NON INVALIDANTE
Amás, la Xunta Electoral dexa claro que la unviada del votu directamente a la Xunta Provincial, en llugar d'a'l Consuláu correspondiente, considérase una irregularidá non invalidante", unviándose a la Llei Electoral. Asina, incide en que "nun hai nenguna otra tacha d'irregularidá salvo la puramente formal del llugar al que s'unvió'l votu".
Fai referencia tamién nel cumplimientu de dos aspectos qu'aseguren el "carácter garantista" d'esti procedimientu del votu per corréu: el procedimientu de votu rogáu pa confirmar la condición d'elector de la persona solicitante de votu; y la comprobación de la so identidá. "La irregularidá denunciada pola formación recurrente nun se refier a nengún d'estos aspectos sinón a una cuestión puramente formal", señala la Xunta Electoral.
