VIGO, 15 Sep. (EUROPA PRESS) -

Caixanova creou unha liña especial de financiamento, dotada con ata 6 millóns de euros e destinada ás pequenas e medianas empresas galegas que desexen levar a cabo proxectos de innovación no marco do Plan Galego de I+D+i.

En virtude dun convenio de colaboración asinado hoxe entre o presidente da entidade financeira, Julio Fernández Gayoso, e o seu homólogo na Fundación Innovapyme, José Manuel Fernández Alvariño, facilitarase financiamento ás pymes galegas que presenten proxectos de innovación no marco dos programas Innicia, Innercia e InnoProtec, que forman parte do Plan Galego de I+D+i.

Caixanova financiará ata o 50% do custo da inversión e ata o 20% do custo do estudio previo do proxecto que presente a empresa. Neste último caso, o custo do financiamento correrá a cargo da Obra Social da entidade, a través do Instituto de Desenvolvemento Caixanova.

Os empréstitos terán prazos de amortización de catro ou seis anos --incluído un ano de carencia--, no caso de que se destinen a financiar o custo do proxecto de innovación, e dun ano se a súa finalidade é custear o estudio previo. O importe máximo a financiar é de 250.000 euros.

OUTROS PROGRAMAS DE FINANCIAMENTO

Ademais desta liña especial de crédito, Caixanova porá a disposición das empresas adheridas ao Plan Galego de I+D+i os programas de financiamento oficiais do Instituto de Crédito Oficial (ICO) e do Instituto Galego de Promoción Económica (Igape), tal e como recolle expresamente o convenio de colaboración subscrito.

A Fundación Innovapyme Galicia é unha organización de carácter empresarial creada a finais do ano 2006, ao amparo da Confederación de Empresarios de Pontevedra (CEP) e co apoio da Xunta, co fin de contribuír a promover a investigación científica, así como o desenvolvemento tecnolóxico e a innovación no ámbito de Galicia, especialmente entre as pequenas e medianas empresas.