A CORUÑA 9 Abr. (EUROPA PRESS) -

O recinto feiral de A Coruña, ExpoCoruña, reunirá do 17 ao 19 de novembro as últimas propostas no ámbito da innovación tecnolóxica en banca, comercio electrónico e administracións públicas no I Salón Internacional de Tecnoloxía (SITE). O evento reunirá 2.000 profesionais deste ámbito de toda España e do estranxeiro.

SITE incluirá un espazo expositivo que, a través de 2.500 metros cadrados, pretende servir de escaparate ás empresas punteiras no ámbito do comercio electrónico, as transaccións e os procesos de dixitalización. Paralelamente, celebrarase un congreso dirixido aos directores de sistemas, de innovación e de internacionalización de todo tipo de empresas.

Entre as actividades paralelas, haberá tamén encontros nos que as empresas e profesionais desvelarán as novidades e tendencias do sector e unha zona na que se poderán coñecer as novas ferramentas tecnolóxicas.

Organizado por ExpoCoruña, SITE conta co apoio da Xunta de Galicia, a Cámara de Comercio de A Coruña e Caixa Galicia como promotoras do proxecto e conta tamén co apoio de empresas e profesionais.

Na súa presentación, o director xeral da Cámara de Comercio de A Coruña, Gonzalo Ortiz, asegurou hoxe que este Salón Internacional da Tecnoloxía pretende "poñer en valor aos produtos e as empresas do sector" e destacou que é a primeira vez que se reunirá profesionais e empresas do sector das tecnoloxías, banca e administracións públicas.

Gonzalo Ortiz remarcou tamén que se trata dunha iniciativa "que nace con vocación de continuidade" e afirmou que "o Salón non quedará só no mercado nacional". Así, avanzou que a Cámara de Comercio de A Coruña realizará unha misión coa presenza de emprendedores doutros países.

Pola súa banda, o director xeral de Investigación, Desenvolvemento e Innovación da Xunta de Galicia, Ricardo Capilla, destacou o "potencial" de Galicia no ámbito da innovación e as novas tecnoloxías e sostivo que "só hai que hai ser capaces de incentivalo". Nesta liña, enmarcou a creación da Axencia de Innovación prevista polo Executivo autonómico galego e que, dixo, pretende apostar "polo concepto de innovación aberta", indicou a referirse á colaboración entre as empresas e as institucións neste ámbito.

A este respecto, sinalou que o posicionamento da Xunta de Galicia pasa, máis que polas subvencións, "por facilitar ferramentas para que as empresas innoven" e considerou un "paso" nesta liña o Salón Internacional da Tecnoloxía.

Pola súa banda, a directora xerente de ExpoCoruña sinalou que está previsto que asistan unhas 400 persoas ao congreso que se celebrará en torno a temas como o comercio electrónico, a interoperabilidade coas administracións públicas, os modelos de desenvolvemento tecnolóxico da banca ou os avances tecnolóxicos no ámbito das transaccións. Así mesmo, prevese a asistencia duns 2.000 profesionais a este evento, que contará tamén coa presenza de Chris Skinner, autoridade mundial sobre o futuro dos servizos financeiros.