SANTIAGO DE COMPOSTELA 21 Ago. (EUROPA PRESS) -

Os artesáns de Galicia apostan por Internet como forma de comercializar os seus produtos co obxectivo de "ampliar" o seu mercado, "captar novos clientes" e "consolidar" novas vías de venda. Así, segundo un estudio, case a metade dispón de páxina web dende a que ofrecen información da súa empresa e facilitan a venda online dos seus produtos.

Segundo os datos recollidos no informe 'Diagnóstico tecnolóxico da artesanía en España', facilitados hoxe pola asociación Fundetec, a Comunidade galega é a que máis utiliza Internet despois dos artesáns vascos e os valencianos.

O estudio, elaborado pola Fundación Española para a Innovación da Artesanía (Fundesarte), realizouse a partir de 2.800 enquisas a talleres artesáns de toda España e foi presentado no I Taller Nacional de Tecnoloxías aplicadas ao Sector da Artesanía, organizado por Fundetec, a Fundación CTIC e a Consellaría de Industria e Emprego do Principado de Asturias.

A "principal" conclusión que se extraeu do taller, celebrado en Llanes (Asturias), é que as Tecnoloxías da Información e da Comunicación (TIC) están a penetrar "lentamente" pero de forma "decididamente innovadora" no sector da artesanía, segundo Fundetec.