Investirá 4,2 millóns, creará 24 empregos e prevé unha produción inicial de 10.000 toneladas métricas

SANTIAGO DE COMPOSTELA, 16 Abr. (EUROPA PRESS) -

Biomasa Forestal S.L., a primeira empresa de pellets creada en España, situarase en Santa Comba (A Coruña) e ten previsto iniciar a súa produción en xullo de 2008. O Instituto Enerxético de Galicia (Inega) contará cunha participación do 20% na súa capital social.

Os promotores do proxecto, que require unha inversión de 4,2 millóns de euros, avanzaron que a previsión de produción será de 10.000 toneladas métricas en 2008, chegando ás 50.000 en 2011. A empresa prevé xeral un volume de negocio de 6,5 millóns en 2011 e crear 24 postos de traballo.

Esta firma adicará a súa actividade á produción de pellets a partir do aproveitamento dos restos forestais das tallas, tanto para sistemas domésticos como industriais. Segundo a Xunta, a biomasa exerce un papel cada vez máis importante no panorama enerxético, sendo a súa combustión unha das solucións máis económicas e racionais para a produción de auga quente, calefacción e vapor.

Ademais, en Galicia o potencial de aproveitamento dos restos forestais das tallas supera o millón de toneladas anuais, materia que conta con enerxía abonda para abastecer de calefacción máis de 100.000 fogares. En concreto, Biomasa Forestal prevé aproveitar unhas 15.000 toneladas de restos forestais o seu primeiro ano de funcionamento, duplicando esta materia prima ao ano seguinte e chegar a empregar 77.000 en 2011.

Os pellets son un tipo de biocombustible sólido, granulado, xerados a partir da biomasa. Con 6-8 milímetros de diámetro, 2.000 quilogramos de pellets teñen a mesma enerxía que 1.000 litros de gasóleo.

REDUCCIÓN DE CUSTOS

A principal vantaxe do seu uso para as industrias é a redución de custos en arredor un 40% e, no caso dos sistemas domésticos, as chemineas ou estufas de pellets son unha solución sinxela e limpa para producir auga quente e calefacción.

O sistema produtivo de Biomasa Forestal baséase nun clasificado dos restos forestais durante o proceso de talla. As fraccións leñosas destínanse á fabricación e pellet e os restos (follas, codias,...) serven de combustible para a fase de secado do proceso de fabricación, contribuíndo así á limpeza dos montes.

No que se refire á produción enerxética, por cada unidade de enerxía empregada en transformar biomasa residual en pellets conséguense seis unidades reais de enerxía no punto de consumo, o que revela idoneidade deste material en aras da eficiencia enerxética.

O conselleiro de Innovación e Industria, Fernando Blanco, e o director do Inega, Xoán Ramón Doldán, recibiron os socios promotores desta empresa, José Javier Arosa Barbeira e Fernando Docampo Freire.