O achado foi publicado na portada da revista máis prestixiosa do campo que centra a investigación

VIGO, 10 Oct. (EUROPA PRESS) -

Os investigadores da Universidade de Vigo David Novoa e Humberto Michinel efectuaron xunto a outros dous físicos un descubrimento no campo dos átomos que foi reflectido na portada da revista máis prestixiosa deste ámbito: 'Phisical Review Letters'.

O artigo, titulado 'Supersolitones: unha nova forma de transmitir información', é froito da investigación realizada xunto a Víctor Manuel Pérez e Boris Malomed, da Universidade de Castilla la Mancha e a Tel Aviv University, respectivamente. Segundo explicou Michinel, a aparición do seu traballo na citada revista é unha "inxección extra" para o prestixio dos autores, posto que os temas de primeira páxina se elixen por ser os de maior impacto e novidade.

O descubrimento dos supersolitones "abre a posibilidade de comunicar átomos entre si de forma totalmente eficiente e forte", explicou o experto. Estas estruturas son, segundo concretou, "ondas similares ao son emitido por unha cadea de bólas feitas de átomos" e que, a temperaturas moi baixas, forman "o estado de materia máis puro que existe", denominado condensado de Bose-Einstein.

SUPERSOLITÓN

Neste condensado os átomos perden a súa identidade individual e confúndense nunha única nube que forma un superátomo, que pode ser observado directamente cunha cámara de vídeo. Esta nube atómica pódese manipular con láser de forma moi precisa e, en certas condicións, "pode formar unha cadea de bólas de átomos". Cada unha destas bólas é un solitón, que pode chocar co solitón veciño.

Así, a onda de colisión entre os solitones atómicos é a que dá lugar ao supersolitón, que non sofre dispersión e que se transmite dun átomo a outro sen cambiar de forma. Desta forma "os átomos poden transmitir información dun átomo a outro de modo forte", engadiu.