O sistema, dotado dunhas 10.000 entradas, traduce de xeito gratuíto textos e documentos
SANTIAGO DE COMPOSTELA, 19 Nov. (EUROPA PRESS) -
Representantes da empresa imaxin/software presentaron hoxe en Santiago o primeiro prototipo de tradutor automático de asimilación inglés-galego-inglés denominado 'Opentrad', que traduce gratuitamente textos, documentos (HTML, RTF e TXT) e páxinas web.
O sistema de tradución, desenvolvido en seis meses pola corporación galega en colaboración co Grupo TALG da Universidade de Vigo e do Grupo Gramática do Español da Universidade de Santiago de Compostela, foi financiado pola Consellería de Innovación e Industria.
Segundo explicou o director de mercadotecnia de imaxin/software, Diego Vázquez, "a principal utilidade desta ferramenta reside en que permite conectar co resto do mundo". "Bríndanos a posibilidade de acceder a outros contidos ao tempo que converte en accesibles os nosos contidos", engadiu.
Sobre a proxección das innovacións na rede, Diego Vázquez subliñou que "para participar da sociedade da información se volve imprescindible dotarse dun patrimonio tecnolóxico". "Cara a iso encamiñámonos con proxectos desta clase", afirmou.
"Dende os axentes involucrados na iniciativa apostouse dende un comezo polo software libre e polo aproveitamento dos recursos xa existentes para converxer no único sistema de tradución automática en código aberto", sinalou antes de rematar a súa intervención ao referirse a outros sistemas semellantes.
CARACTERÍSTICAS
Pola súa banda, o director da área de tecnoloxía lingüística e responsable do proxecto, José Ramón Pichel, encargouse de explicar o funcionamento e características do tradutor. Así, resaltou no feito de que o instrumento de tradución se basea nas "regras de transferencia", por medio das cales se efectuan as conversións das estruturas gramaticais.
Á súa vez, ao longo da súa intervención recalcou que "se ben é certo que non posúe unha inmensa riqueza lingüística, hoxe por hoxe, coas 10.000 entradas de que está dotado, proporciona unha enorme utilidade para os seus usuarios".
Na páxina web http://opentrad.imaxin.com e no sitio www.opentrad.com pódese comprobar o seu funcionamento e o dos outros 26 pares de idiomas que integran o consorcio 'Opentrad'.
