VIGO, 28 Ene. (EUROPA PRESS) -
Vigo acolle dende hoxe, e durante un total de tres días, a carpa Innovate, coa que Telefónica mostra ao público os últimos avances tecnolóxicos en materia de saúde e accesibilidade, responsabilidade social, entretemento e multimedia, entre outros.
O espazo, situado na explanada do Náutico e que foi inaugurado polo voceiro municipal do PSdeG en Vigo, Carlos López Font, e o director territorial de Telefónica en Galicia e Asturias, Ignacio Aller; estréase na cidade olívica e posteriormente percorrerá outras poboacións españolas.
Entre as iniciativas expostas, destaca unha plataforma interactiva que permite desenvolver de forma remota terapias de rehabilitación de lesións de xeonllo, un servizo de teleasistencia onde o móbil é o elemento principal e o denominado Posto adaptado, un servizo que facilita o acceso ás Tecnoloxías da Información e Comunicación (TIC) ás persoas con minusvalidez.
Ademais, dentro da área de entretemento e multimedia, a mostra permite contemplar a televisión en 3D desenvolvida para a plataforma Imagenio. Este avance, ao igual de todos os que se exhiben en Innovate, aínda non se comercializa.
Finalmente, a carpa tamén inclúe un departamento con avances en materia de publicidade e mercadotecnia, con sistemas de realidade aumentada e códigos BIDI, unha versión mellorada dos códigos de barras a información das cales pode ser lida coa cámara de fotos dos teléfonos móbiles.
