A CORUÑA, 4 Mar. (EUROPA PRESS) -

Un equipo de investigación da Universidade da Coruña creou un programa para facilitar o acceso á informática de persoas maiores e minusválidos. Este proxecto é o resultado da colaboración entre o órgano académico, Cruz Vermella, a Asociación de Pais de Persoas con Parálise Cerebral (Aspace) e a Obra Social da Fundación La Caixa.

O reitor da Universidade da Coruña, José María Barja; o presidente provincial de Cruz Vermella, José Manuel García; o director xerente de Aspace, Eulogio López; e Susan Santos, da Obra Social da Fundación La Caixa, materializaron hoxe esta colaboración, a través da sinatura dun convenio na sede do reitorado coruñés.

Tras a sinatura, explicaron que o obxectivo desta iniciativa é "potenciar e estimular" a autonomía persoal das persoas maiores e os minusválidos e mellorar a súa calidade de vida, ademais de contribuír a favorecer a igualdade de oportunidades co resto da sociedade.

Para iso, un equipo da Universidade da Coruña desenvolveu un programa que simplifica a interface do ordenador creando teclados virtuais. Desta forma, un usuario pode utilizar unha computadora convencional de forma moito máis doada e intuitiva.

No seu deseño, desenvolvemento e posterior implantación participaron Aspace e Cruz Vermella, entidade que puxo en marcha un programa piloto con catro maiores do seu Centro de día de A Coruña. Agora, segundo os responsables desta iniciativa, o obxectivo é lograr a adhesión de máis usuarios e "dinamizar" en Galicia o uso das tecnoloxías da información noutros centros con persoas con minusvalidez, así como entre os maiores.