O lanzamento da primeira fase do proxecto coincidirá co Xacobeo 2010 e contará cun presuposto de 3,5 millóns de euros
SANTIAGO DE COMPOSTELA, 28 Jul. (EUROPA PRESS) -
A partir do próximo ano poderá haber peregrinos cibernéticos, xa que un videoxogo recreará nun "universo virtual" o Camiño e a cidade de Santiago de Compostela do século XII. O lanzamento da primeira fase do proxecto, que contará cun presuposto de 3,5 millóns de euros, coincidirá coa celebración do Xacobeo 2010, e estará operativo en xullo do próximo ano.
Un consorcio de empresas formada pola galega Ficción Producións, Imatia, One Click e Planet media é o encargado deste proxecto virtual, denominado 'O Camiño', que contou coa colaboración das universidades de Vigo e Santiago de Compostela.
Este 'metauniverso' --universo virtual en 3 dimensións-- reconstruirá a cidade de Santiago e a Ruta Xacobea no ano 1117, data das revoltas dos compostelanos contra o bispo Gelmírez e a raíña Urraca, unha época "clave" na historia de Galicia.
Segundo anunciaron os representantes do consorcio de empresas, esta iniciativa constituirá o comezo "dun proxecto máis amplo" que consistirá no deseño dunha "plataforma tecnolóxica de desenvolvemento de futuros 'metauniversos'.
"RIGOR CULTURAL E HISTÓRICO"
A "novidosa" iniciativa mostrará tridimensionalmente aos usuarios a recreación dos elementos arquitectónicos e sociolóxicos máis representativos da época, entre os que destacan a Catedral de Santiago, aínda en construción, o pazo de Gelmírez na Praza da Quintana e casaríos e tendas do século XII, para o que, por outra parte, foi necesario un "exercicio de imaxinación".
A plataforma vitual tamén contou co asesoramento do profesor Miguel Taín, do departamento de Xeografía e Historia da USC, para dotar ao proxecto de "rigor cultural e histórico", tal e como manifestaron os seus responsables.
Desta forma, os participantes deste 'metauniverso' poderán meterse na pel de diferentes personaxes ou 'avatares' --representación gráfica coa que os usuarios xogan e se identifican--, como soldados ou cidadáns deseñados "fielmente" a través dunha tarefa de documentación na que se consultou dende coleccións medievais privadas, ata códices, 'cantigas' ou relevos da época.
Así mesmo, o asesoramento das universidades tamén se encargou do deseño dos contidos didácticos de 'O Camiño', como a "reprodución de diálogos, un glosario de termos técnicos ou fichas cos datos máis significativos" dos distintos monumentos presentes na plataforma.
O videoxogo terá un aspecto educativo, xa que, segundo Taín Guzmán, introducirá os mozos "no mundo da Historia de forma amena e actual" coa finalidade de que "coñezan e valoren os momentos históricos narrados en primeira persoa".
COMPOSTELANA VIRTUAL"
Na presentación de 'O Camiño', os representantes do consorcio creador sinalaron que se trata dun "proxecto moi ambicioso" e que xestionará unha "grande cantidade de contidos", para foino necesario o "traballo multidisciplinar" de máis de 80 persoas que, como informaron, "posiblemente se multiplique".
Por outra banda, destacaron o carácter "innovador" da plataforma, que incorporará elementos de tecnoloxía avanzada como o acceso ao xogo a través da telefonía móbil ou a posibilidade de que os usuarios deste 'metauniverso' poidan indicar na rede a súa "situación real no Camiño mediante dispositivos de xeoposicionamiento"
Estes dispositivos, tal como se avanzou na presentación, "facilitarán mesmo que se poida conceder aos usuarios unha Compostelana virtual" --documento que acredita que os peregrinos realizaron a Ruta Xacobea--.
A coincidencia do lanzamento deste 'universo virtual' coa celebración do ano Xacobeo 2010 buscará que as persoas "gocen coñecendo as orixes" da cidade de Compostela "a través da alta tecnoloxía".
