SANTIAGO DE COMPOSTELA, 10 Mar. (EUROPA PRESS) -

Un equipo da Facultade de Ciencias da Educación da Universidade de Santiago de Compostela (USC) deseñou un método innovador para mellorar a aprendizaxe da lingua de signos a través de internet e achegala á sociedade.

Para iso, utilízanse a videoconferencia e o video dixital como ferramentas básicas, posto que a lingua de xordos basea no aspecto visual. Tamén se utilizan internet e outras técnicas multimedia para optimizar o coñecemento desta lingua.

Ademais, a metodoloxía que empregan é, segundo indicaron, "flexible e adaptada a cada alumno", cunha tutorización persoal e con sesións de videoconferencia en pequenos grupos mediante unha plataforma virtual accesible en todo momento para os usuarios interesados e baseada no software libre.

Ao respecto, consideran que representa "unha innovación" fronte a outros cursos que "aínda que están en internet non favorecen moito a interacción" e fronte a outros presenciais que son "moi exhaustivos no tempo, o que representa un impedimento para moita xente".

CURSO MULTIMEDIA.

Por outra banda, desenvolveuse un curso multimedia básico para a aprendizaxe da lingua de signos a partir do material que utiliza a Federación de Asociacións de Persoas Xordas de Galicia nos seus cursos presenciais, e ofrécense exercicios baseados en videoconferencias entre o alumno e o titor.

Este curso xa foi testado e os seus resultados comparáronse cos obtidos nos cursos presenciais de lingua de signos e a avaliación fíxose sobre unha mostra de alumnos de Maxisterio, por tratarse dun colectivo interesado na aprendizaxe do idioma.

Tras a realización do curso, os profesores valoraron que a aprendizaxe é "máis intuitiva e rápida" con este modelo. "Avánzase máis nun mes con este método que en dous meses de clases presenciais", asegurou.

Con este método, os alumnos pódense ver no vídeo tantas veces como sexa necesario, a xeito de adestramento. Despois, grávanse cunha webcam e envían o exercicio ao profesor, do que reciben a resposta, segundo explicou o equipo da USC.

CULTURA DA COMUNIDADE XORDA.

Como na lingua de signos ten moita importancia a expresividade que acompaña aos xestos feitos coa man, nas explicacións que se fan a través do video móstranse zonas específicas do corpo, como a expresión dos ollos.

Ademais, os investigadores inciden no feito de que a comunidade de xordos ten unha cultura moi particular, polo que non se traballa só con contidos lingüísticos, senón que se combinan con aprendizaxes dos trazos da cultura, de modo que este método tamén favorece o desenvolvemento de actitudes de cara á súa cultura.

Este prototipo tamén está testado, polo que o seguinte paso é a transferencia da tecnoloxía para a súa posta en marcha e a súa utilización por parte da sociedade.