SANTIAGO DE COMPOSTELA, 26 Mar. (EUROPA PRESS) -
O Goberno galego marcouse como obxectivo que en 2013 Galicia conte con 5.000 mulleres adicadas á investigación ou como persoal auxiliar neste ámbito. Na actualidade, a Comunidade galega conta un total de 3.103, que para 2010, a Xunta pretende que sexan case un millar máis, un global de 4.000.
Estes son os obxectivos cos que traballa a Consellería de Economía, segundo informou hoxe en comisión parlamentaria o director xeral de Planificación Económica e Fondos Comunitarios, Aureliano García González-Llanos, quen admitiu que esta cifra é a que presentaron o 6 de marzo ante a UE no Programa Operativo Feder 2007-2013, en concreto, no referente aos obxectivos no indicador estratéxico 'mulleres dedicadas a I+D'.
En todo caso, lembrou que o Goberno galego investiu 175 millóns no Programa Estratéxico I+D+i 2007-2010 para lograr máis investigadores na Comunidade autónoma.
García González-Chairos explicou que, nestes momentos, o programa operativo presentado á UE está en fase de negociación polo que anunciou que, finalmente, os obxectivos e medidas propostas pola Comunidade galega serán obxecto de "axustes e modificacións", aínda que descartou que estas sexan "substanciais", xa que precisou que o programa presentado polo Executivo galego foi declarado "admisible".
SITUACIÓN PARA NON ESTAR ORGULLOSOS
O director xeral de Planificación destacou que Galicia experimentou un crecemento no gasto I+D sobre o conxunto do Produto Interior Bruto (PIB) entre 2004 e 2005 do 40%. Porén, recoñeceu que, "lamentablemente", a situación de Galicia nesta materia "non é da que se poida estar orgulloso".
Así, admitiu que existen "moitas variables" e indicadores en I+D nas que Galicia "aínda ocupa os últimos postos da lista", aínda que advertiu de que este non é o caso do gasto en I+D+i, cun 0,89%, o que sitúa a comunidade na "metade da táboa entre as 17 CC.AA".
No entanto, García González-Llanos lembrou que o peso de I+D na economía galega é inferior ao que ten a investigación e desenvolvemento na estatal, o que supón un síntoma de "debilidade e déficit" ante o que asegurou que a Administración galega está a facer "esforzos" na súa política presupostaria para cambialo.
