Luar na Lubre presenta mañá o seu último disco como homenaxe á emigración e ao exilio galego en Latinoamérica

Europa Press Galicia
Actualizado: jueves, 20 julio 2006 22:12

SANTIAGO DE COMPOSTELA 20 Jul. (EUROPA PRESS) -

As Festas do Apóstolo acollen mañá o "Compostela Festival" no que participarán o grupo coruñés Luar na Lubre e o grupo Bumba, con compoñentes de Mozambique e Galicia. A cita terá lugar ás dez da noite na Praza da Quintana e servirá para presentar o ultimo disco do grupo folk galego como homenaxe á emigración e ao exilio galego en Latinoamérica.

Nun comunicado, un dos seus compoñentes, Bieito Romero "sempre é moi importante tocar en Galicia xa que como músicos, é a nosa razón de ser". "Probablemente somos o grupo galego que máis toca en España pero facer concertos en Galicia é unha ledicia, gústanos amosar a nosa música", indicou.

O repertorio que ofrecerán mañá é un percorrido polos temas máis coñecidos do grupo, ademais da presentación do seu último traballo, "Saudade". Este disco está adicado á emigración e ao exilio galego en Latinoamérica. Desde que comezaron as súas viaxes por América, no ano 2001, foron recollendo material para este traballo ao que califican como "un traballo de investigación da música e da literatura dos galegos que marcharon a América e que nos deixaron un legado moi sorprendente e descoñecido en Galicia".

Contenido patrocinado