Os bens e servizos que a natureza proporciona son considerados pola sociedade coma un patrimonio natural de "gran valor"
SANTIAGO DE COMPOSTELA, 24 May. (EUROPA PRESS) -
A Universidade de Santiago de Compostela (USC), o Ministerio de Medio Ambiente, o Grupo Tragsa, e as Universidades do Grupo Vane organizan o 'Simposio sobre valoración económica de activos naturais', que se celebrará dende mañá no Hotel Puerta del Camino de Santiago de Compostela e prolongarase ata o venres día 26.
O simposio, que se inaugurará mañá ás 10.00 horas, organízase en torno a tres bloques. Cada un acollerá diversos relatorios e, ao finalizar estes, procederase a debater o exposto nunha mesa redonda. A primeira estará moderada polo director adxunto de Asuntos Medioambientais de Tragsa, José María Rábade, e integrará cinco relatorios.
O catedrático de Teoría Económica da Universidade de Alacalá de Henares, Diego Azqueta, pronunciará a conferencia 'A valoración da natureza: dos impactos ambientais ao capital natural'. Posteriormente os profesores do Departamento de Economía e Ciencias Sociais Agrarias da Universidade Politécnica de Madrid, Luis Díaz e Jaime Martínez, disertarán sobre a caracterización das sostibilidade nos sistemas forestais a través de técnicas multicentro e as experiencias en valoración dos ecosistemas agrarios, respectivamente.
O cuarto relatorio que integrará a primeira mesa redonda correrá a cargo do profesor do Departamento de Economía Aplicada da Universidade de Vigo, Albino Prada, que falará sobre a valoración da paisaxe.
Pola súa banda, o profesor do Departamento de Economía, Socioloxía e Política Agraria da Universidade de Córdoba, Julio Berbel, explicará unha metodoloxía para a valoración económica dos recursos híbridos da conca do Guadalquivir.
Os relatorios da segunda mesa redonda, que será moderada polo catedrático da Escola Politécnica Superior de Lugo, Antonio Rigueiro, comezarán mañá ás 9.00 horas. Previamente ao coloquio terán lugar os relatorios, 'Análisis coste-beneficio', 'Valoración dos montes como sumidoiros de carbono', 'Insuring liabilities for Environmental Damage The Challenges faced by Insurers' e 'Valoración e xestión de recursos pesqueiros baixo condicións de incertidume de prezos'.
A última mesa do simposio, moderada polo director Técnico de Tragsa, Antonio Hernández, comezará a partir das 11.10 horas. Os temas a tratar serán os usos e desusos dos métodos para a evaluación dos recursos da auga, o valor do uso social do monte, o valor estatístico da vida en España e os modelos territoriais de valoración de activos.
ACTIVOS NATURAIS
Os activos naturais, é dicir, os bens e servizos que a natureza proporciona son considerados pola sociedade coma un patrimonio natural de gran valor. Non obstante, non se soen ter en contar á hora de tomar decisións debido á dificultade de aplicar métodos de valoración necesarios sobre eles.
Isto provoca que a valoración económica dos activos naturais sexa unha tarefa "tan ineludible como complexa", segundo indicaron fontes da organización. Neste marco, o Ministerio de Medio Ambiente iniciou un proxecto para o establecemento dunha cartografía que recolla a valoración de todos os activos naturais de España.
O seu principal obxectivo é determinar o valor, en termos monetarios das funcións, bens e servizos proporcionados polos diferentes ecosistemas do país. Dada a envergadura do proxecto fíxose preciso constituír un equipo amplo no que participan seis universidades, entre elas, a de Santiago.
