O 'Vía Stellae' conclúe no Camiño Francés cun concerto en Portomarín de José Enrique Pedrosa e Fernando Reyes

PORTOMARIN (LUGO), 22 (EUROPA PRESS)

Dous músicos galegos, o cantante José Enrique Pedrosa e o laudista Fernando Reyes, serán esta fin de semana os protagonistas de varios concertos no Camiño Francés e máis no Camiño Norte, dentro do Festival 'Via Stellae' organizado pola S.A. de Xestión do Plan Xacobeo.

Así, hoxe Pedrosa e Reyes actuarán na Igrexa de San Xoán de Portomarín (Lugo) e mañá domingo na Igrexa de San Xoán de Lagostelle en Guitiriz (Lugo).

A actividade no Camiño Francés remata hoxe con esta actuación baixo o título 'Cantabo Domino: Tons divinos, motetes, arias e cantatas do Barroco'.

Ambos ofrecerán un fermoso e atraínte programa de música sacra que inclúe tons divinos, motetes e cantatas religiosas barrocas xunto a arias de dous oratorios de Haendel (Saúl e Jephta).

Neste concerto poderán escoitarse ademais obras de Girolamo Kapsberger, Claudio Monteverdi, Alessandro Piccinini, Giacopo Peri, Alessandro Grandi, Giovanni Battista Bassani, Antonio de Santa Cruz, Juan Hidalgo, Gaspar Sanz, Juan de Paredes e Sebastián Durón. A entrada para este concerto será libre ata completar a capacidade da igrexa.

Tralos concertos de Vilalba, Mondoñedo e Ribadeo, a actividade do Festival 'Via Stellae' continúa no Camiño Norte en Guitiriz mañá (21.00 horas) na Igrexa de San Xoán de Lagostelle coa actuación dos mesmos intérpretes: o cantante José Enrique Pedrosa e o laudista Fernando Reyes. A entrada para este concerto será libre ata completar a capacidade do local.

O último concerto do Camiño Norte terá lugar na Igrexa de San Martiño de Mondoñedo en Foz o venres 28 de xullo. Mercedes Hernández e o grupo Resonet interpretarán 'Les Pellerines: a Moda da Peregrinación na Francia do Barroco'. O concerto terá entrada libre e celebrarase ás 21.00 horas.