UVIÉU, 19 d'Abril (EUROPA PRESS)
Los responsables del Centru Niemeyer denegaron la cesión de les instalaciones pa la celebración del Conciertu Pola Oficialidá, que tolos años entama la Xunta Pola Defensa de la Llingua Asturiana, y qu'esti añu llega a la so vixesimoquinta edición.
Polo menos asina lo informa nuna nota prensa la Xunta Pola Defensa de la Llingua Asturiana, qu'esti añu, coincidiendo col venticinco aniversariu del eventu, quier celebralu n'Avilés, na mesma ciudá na que tuvo llugar la so primer edición en 1989.
La Xunta esplica que pensó "nun espaciu simbólicu de la imaxe nueva de la ciudá: el Centru Niemeyer". "Un espaciu y una esplanada qu'al paecer del so diseñador habíen tar abiertos a la participación del pueblu, pero bien se sabe qu'una cosa ye la teoría y otra la visión más prosaica de los nuestros próceres y allegaos", critica'l comunicáu.
Cuenta la organización que cuando los sos representantes s'entrevistaron colos responsables del centru cultural "punxeron escuses pa nun dicir que nun queríen actos reivindicativos de la oficialidá: nun había feches, yera demasiao tarde, yá se reunió'l patronatu..., pero si-yos viniere la propuesta de cualquier estrella, reconocieron, yá lo iguaben pa que pudiere actuar en pocos díes".
La Xunta considera que "estos mausoleos faraónicos (en referencia al Centru Niemeyer) son los que meyor van falar nel futuru de la so ideoloxía escarniada: en nome de la cultura y la participación xenérase un discursu y unes polítiques que tienen como resultáu un decoráu de cartón-piedra pa favorecer y, sobre too, xustificar l'apartheid y llavar l'auto-odiu".
La organización recuerda amás que'l Conciertu Pola Oficialidá ye "ún de los festivales musicales de más tradición y trayectoria de los que se faen n'Asturies", y destaca'l "valir simbólicu que tien pa la música asturiana y la reivindicación llingüística".
