UVIÉU, 12 de Payares (EUROPA PRESS)
El dibuxante y músicu, miembru del grupu de folk Felpeyu, Ruma Barbero, ye'l gandor de la edición 2009 del premiu 'Alfonso Iglesias' de cómic en llingua asturiana, que tolos años concede la Conseyería de Cultura del Principáu d'Asturies, según informó'l Principáu al traviés d'una nota prensa, tres la decisión del xuráu, que falló'l premiu esta mañana.
Ente les obres presentaes, informó la Conseyería, "el xuráu decidió por unanimidá conceder el Premiu al testu tituláu 'Manzajú', al valorar que se trata d'una gran narración gráfica, mui sólida y moderna y con un gran dominiu técnicu de tolos recursos propios del cómic". El testu presentólu baxo'l seudónimu 'La Gocha Pegui'. Abierta la plica, l'autor resultó ser Rumaldo Antón Barbero de Diego.
Ruma Barbero nació en Xixón en 1971. Ye llicenciáu en Belles Artes na especialidá de 'Escultura' pola Universidá de Salamanca y miembru fundador del grupu de folk asturianu 'Felpeyu', col que continúa n'activo. Ganador nel añu 2003 del primer Premiu de Cómic de la Comarca de la Sidra, ye tamién fundador, xunto con Xosé Antón García Sampedro, de la editorial 'Cactus Cómics', que publicó dalgunos de los títulos más influyentes d'esti xéneru n'Asturies. Per otra parte, ye tamién un destacáu diseñador gráficu, autor de les carátules de discos de Felpeyu, La Bandina o DRD y de carteles teatrales pa les actuaciones del grupu Nun Tris.
A mediu camín ente'l cómic y el diseñu gráficu, ta'l Cómic-CD de Los Ciquitrinos 'Faciendo l'indio' (2009), del que tamién ye autor. Amás de lo específicamente rellacionao col cómic, Rumba Barbero, ye lletrista de los grupos Felpeyu, Los Ciquitrinos, Tejedor y Blima, amás de collaborador de delles publicaciones periódiques.
El xuráu aconceyó esti mediudía na sede de la Conseyería de Cultura y Turismu baxo la presidencia de la Directora Xeneral de Política Llingüística, Consuelo Vega Díaz, y cola participación de los especialistes, José Antonio García Fernández (escritos y guionista de cómic), Ernesto García del Castillo 'Neto' (dibuxante gráficu) y Jorge Iván Argiz (escritor y director del Festival del Cómic d'Avilés). Actuó como secretaria María Antonia Pedregal Montes, Xefa del Serviciu de Política Llingüística.
