UVIÉU, 5 de Mayu (EUROPA PRESS)
La Xunta Pola Defensa de la Llingua cuenta que'l parlamentu asturianu debata nel 2018 una propuesta de reforma del Estatutu d'Autonomía para declarar oficial la llingua asturiana. La iniciativa yá tendría aseguráu l'apoyu mínimu exixíu de 12 diputaos pa poder presentala, aunque nun trescendió quién son nin de qué partíu.
Asina lo anunció Xosé Candel, representante de la Xunta, en declaraciones a Europa Press, antes de la manifestación pola oficialidá del asturianu, que tuvo llugar esti vienres, Día de Les Lletres, peles cais d'Uviéu.
Na marcha, la Xunta anunció'l Proyectu Oficialidá 2018. La intención de la organización ye entamar una campaña de movilizaciones y reuniones que desaguaría nel debate parlamentariu de la iniciativa. El colectivu tien fondes esperances de que la propuesta salga alantre, y con esi envís pa desarrollar conversaciones con toles fuerces polítices, especialmente col PSOE.
Candel mencionó dellos "detalles" qu'indiquen, según la so visión, que'l PSOE pue modificar la so postura "monolítica" sobre la oficialidá de la Llingua. Ente ellos, tán l'apoyu a la oficialidá de los socialistes nel Conceyu de Bimenes, la puesta de la bandera de Conceyos pola Oficilidá nel balcón Conceyu d'Ayer o l'aprobación d'ordenances municipales pol gallegu asturianu n'A Veiga, y el preste a la redacción de les mesmes (nesti casu del asturianu) nel d'Avilés, conceyos toos ellos gobernaos pol PSOE (menos el de Bimenes).
Tamién señaló la presencia de cargos municipales del PSOE na manifestación, que percorrió'l centru d'Uviéu p'acabar, como siempre, frente al Teatru Campoamor. Ello ye qu'esti añu recuperóse la presencia de la pancarta de Conceyos Pola Oficialidá, tres la que caminaron cares conocíes de la política autonómica y llocal asturiana.
La manifestación tuvo encabezada polos gaiteros pola oficialidá, y nella participaron delles organizaciones , sindicatos y partíos políticos (Izquierda Unida y Podemos, de los que tienen representación parlamentaria). La lluvia empañó en dellos momentos la movilización que, sicasí, llegó al Teatru Campoamor a la hora prevista, pa coincidir col actu institucional de l'Academia de la Llingua pol Día de les Lletres.
