UVIÉU, 17 Abr. (EUROPA PRESS) -
La Executiva de la FSA-PSOE va tar representada na manifestación pola oficialidá del asturianu y del gallego-asturianu qu'entama la Xunta pola Defensa de la Llingua Asturiana esti 21 d'abril n'Uviéu, según anunció esta asociación al traviés de la so cuenta de twitter.
Anque les Mocedaes Socialistes participaron delles veces nes manifestaciones pola oficialidá, sobre too nes entamaes en metá de los debates políticos sobre la reforma del Estatutu d'Autonomía d'Asturies, va ser la primer vez que'l partíu tea representáu oficialmente nuna marcha a favor d'esti marcu llegal pal asturianu.
A finales de los años noventa, en metá del procesu de reforma del Estatutu, destacaos dirixentes del PSOE asturianu, como Antonio Trevín, José Luis Iglesias Riopedre o Graciano Torre llegaron a cuestionar la posición del so partíu, históricamente contrariu a la oficialidá, y llegaron a participar a títulu individual en dalguna manifestación.
Pel momentu, fontes de la FSA consultaes por Europa Press nun quixeron confirmar la persona o persones que diben representar a la Executiva de la FSA-PSOE na manifestación d'esti sábadu. Con too, nun va ser el secretariu xeneral, Adrián Barbón, que foi preguntáu en twitter pola cuestión y afirmó que nun podría dir por tener "un actu".
"Non, yo nun puedo, pues tengo un actu. Pero va dir una delegación de la executiva de la FSA-PSOE. Yá-ylo comenté a la Xunta", respondió Barbón a un usuariu que-y preguntó en twitter si diba velu na manifestación pola oficialidá.
"CAMBIU XENERACIONAL"
La militancia de los socialistes asturianos alcordó nel 32 Congresu de la FSA, el 1 d'ochobre del añu pasáu, respaldar esti marcu llegal pa la llingua asturiana, una midida que foi apoyada publicamente dende la Executiva nueva del partíu, encabezada por Adrián Barbón, y que va visibilizase esti sábadu cuando, pela primer vez en 30 años, la FSA acuda a una manifestación pola oficialidá
Mesmamente, el secretariu xeneral del PSOE, Pedro Sánchez, afirmó a finales de marzu nuna entrevista na televisión autonómica, TPA, qu'había que respetar les decisiones del Congresu y mostróse convencíu de qu'Adrián Barbón, diba topar con una "formula integradora" sobre'l modelu d'oficialidá a desarrollar en Asturias.
Esti mesmu martes, al traviés d'una nota de prensa, la Xunta pola Defensa de la Llingua Asturiana dio a conocer que'l secretariu xeneral de CCOO y d'UXT n'Asturies, José Manuel Zapico y Javier Fernández Lanero, apoyaben la convocatoria.
A estos había que sumar l'apoyu del secretariu xeneral del SOMA, José Luis Alperi, sindicatu fuertemente vinculáu a la historia del socialismu asturianu. Una situación que pa la Xunta pola Defensa de la Llingua "ye exemplu del cambiu xeneracional y de la llegada d'una fornada nueva de dirixentes que nun lleven al llombu los prexuicios de la xeneración anterior".
